Meth leh heroin man hnem
Tunhnai khan Mizoram Police chuan Aizawl leh a chhehvelah heroin leh methamphetamine thahnem tak an man.
July 22 khan Special Narcotics Police Station leh 34 Assam Rifles tangdun chuan Khatla Aizawl-ah heroin gram 21.330 a an man. Ruihhlo hi R Lalhumhima (26), Chhawrtui Khawzawl district chhuak, tuna BSUP Lawipu Aizawl-a cheng mek kut atangin man a ni. ND&PS Act hnuaiah thubuai ziahluh a ni.
July 21 khan CID (SB) leh Kolasib DEF tangdun chuan Khamrang khaw daia national highway-ah ruihhlo vai beihpui an thlak a. Methamphetamine mum nuai 15 vel, kg 15 a rit an man. He thila inhnamhnawih mi pali – Sailothanga Sailo (42), Venglai Kolasib; Lalchhuanmawia (23) Gosen Veng Kolasib; Vanlalthlana (32), Diakkawn Kolasib leh Laldinpuii (43), Vengthar Kolasib an man a. Kawnpui Police Station-ah ND&PS Act 1985 tlawhchhanin thubuai ziahluh a ni.
July 21 zan dar 7.00 vel khan DSB Lunglei leh 92 Bn BSF Zotlang Lunglei tangdun chuan Sethlun Lunglei-ah heroin gram 71.59 (hawng 6) an man a; mi pahnih – Malsawmdawnga (33), Champhai Vengthlang leh Lalzarmawii (34), Bazar Veng Lunglei man telin, Lunglei Police Station-ah thubuai ziahluh a ni.
July 17 zan dar 6.00 vel khan CID (SB) Operation Team chuan New Look Restaurant Chanmari Kawn Aizawl an dap a. Restaurant-ah hian methamphetamine kg 4.770, an man. He thila inhnamhnawih Karimganj district Assam lam mi pathum – Juber Ahmed (24), Md Sirajul Hoque (24) leh Sakir Hussain (21) man an ni a, ND&PS Act hnuaiah thubuai siamsak an ni.
Hemi ni vek zan dar 9.40 vel khan CID (SB) Team hian Thuampui Aizawla Delhi Dhaba bulah lirthei pakhat, Malsawmtluanga (29), Zokhawthar Champhai district khalh atangin methamphetamine kg 9.016 an man a, ND&PS Act hnuaiah thubuai ziah luh a ni.
Meth leh heroin man hnem
