Damdawi ruih theih, methamphetamine tawlhruk vanga man mi pali chu court-in thiam loh a chantir a, kum 10 theuh lung in tang tur leh cheng nuai khat theuh chawi turin a hrem.
2022 October 28 khan Excise & Narcotics Department chuan methamphetamine mum 10000 (kg 1 & gram 4) leh he case-a inhnamhnawih nia puh mi pali – Zodingliana @ Zadingluaia (40) Chaltlang Venglai Aizawl; Samil Ahmed (28) Kalalchouri Karimganj district Assam; Vanlalruati (41) North Hlimen Kolasib district leh Zorampari (46) Bilkhawthlir Kawnveng te an man a. An pali hian The
Narcotic Drugs & Psychotropic Substances Act 1985 tlawhchhanin thubuai siamsak an ni.
Special Court (ND&PS Act 1985) judge R Lalduhawmi chuan thubuai hi ngaihtuahin, thuhretu a koh bakah finfiahna hrang hrang a endik hnuah kumin February 9 khan ND&PS ND&PS Act 1985 tlawhchhanin thiamloh chantirin February 13 khan thiamloh changte hremna hi a puang. Zodingliana @ Zadingluaia hi heng ruihhlo hralh tur zuartu ber niin, Section 22 of NDPS Act hmangin kum 10 chhung hrehawm taka lung in tang tur leh sumfai nuai khat chawi tura hrem a ni a, sumfai chawi tur a neih loh chuan thla 4 dang a tan belh ang.
Midang pathum – Samil Ahmed, Vanlalruati leh Zorampari te pawh Section 22 of ND&PS Act hmangin kum 10 chhung hrehawm taka lung in tang theuh tur leh sumfai nuai khat theuh chawi tura hrem an ni a, sum chawi tur an neih loh chuan thla 2 dang an tan belh ang. Chutihrualin court-in an chungah zahngaihna lantirin, heng hremna chi hnih hi hun thuhmuna kaltir (concurrently) a ni ang.
Meth vanga man kum 10 tang dawn
