Mi sualten Mexico-a San Mateo Piñas mayor an kap hlum a, hei hi tual chhunga thuneituten beih an tawh fova a tharlâm ber a ni.
Thil thleng hmutute chuan motorcycle-a chuang mipa paliin an khuaa hall luhchilhin Mayor Lilia Gema García Soto-i an kap hlum niin a sawi a, a sawitu hi tual chhung thuneitu sang tho, mayor nena thutkhawmnaa tel, Eli García Ramírez a ni.
Municipal police officer pahnihin he thil thlengah hian hliam an tuar bawk.
Thuneitute chuan he inthahna thleng hi a chhan an chhui zui nghal mek a, mi sual pawlte hian tual chhung thuneitute laka an thil phut tihhlawhtlinsak an nih loh hian hetiang hian an che fo thin a ni.
García Soto-i hi kumina Oaxaca state-a mayor thah pahnihna a ni a. May thla khan Santiago Amoltepec mayor chu lambunin kah hlum a lo ni tawh a, car-a a chuan mi dang pahnih pawh an thi tel bawk.
Oaxaca governor chuan Mayor García Soto-i thahna chu a dem thu a sawi a, a titute chu hrem lohva an chhuah dawn loh thu a sawi bawk.
Venhim hna thawktute chuan a kaptu mi pali, tlanchhe zui nghalte hi an zawng zui mek a. State prosecutor pisa chuan sorkar laipui hnuaia agent-te pawh tirin chhui hna thawhpui turin a ti.
Tun hnaiah Mexico-ah hian tual chhung politician leh vantlang pisa luah tuma bei mekte beihna hi a thleng zing hle a, nikuma an ram inthlanpui neih dawn atang khan a khât tawkin a thleng deuh reng.
Politician beihna hi a tlangpuiin khaw tê deuhva thleng a ni zel a, heng khaw lian lovah hian mi sual pawlte hi an chak deuh zel a. Hetih lai hian thla hmasa khan an ram khawpui ber, Mexico City-a mayor thawhpui hnai tak pahnih kah hlum an ni a, an ram pawh a barakhaih hle a ni.
Mexico-ah mi sualten San Mateo Piñas mayor kap hlum
