Mexico-a hmun hlui langsar tak pakhata mi pakhatin silai a hmeh puahah Canadian hmeichhia kum 32 mi a thi a, mi 13-in hliam an tuar bawk niin Mexican thuneituten an sawi a. Silai kengtu hi a inthat ve nghal.
Mexican President Claudia Sheinbaum-i chuan an ram chhunga khualzinte tlawh thin hmun pawimawh ber pakhat, Teotihuacán khawpui hlui, pyramid complex-a silai hmeh puah vanga thi chhungte a tawrhpui thu a sawi.
Tual chhung prosecutor-te chuan mi kaptu hi Julio César Jasso Ramírez, Mexican a nih thu an X-ah an tar lang a, a bak thu chiang an tar lang lo.
Mexico sorkara security cabinet chuan hliam tuar mi 13, kum ruk atanga kum 61 inkarte chu damdawi inah enkawl an nih thu a sawi.
Thawhlehni khan Canadian Prime Minister Mark Carney-a chuan hmeichhe thah chhungte chu a tawrhpui thu a sawi a, thil rapthlak tak a nih thu a sawi a. Thuneituten tunge a nih an la sawi lo.
Carney-a chuan Sheinbaum-i’n rang taka hma a laknaah lawmthu a hrilh bawk a, thil thleng chungchangah hian Canada leh Mexico thuneitute an thawh dun thu a sawi bawk.
Teotihuacán-a pre-Hispanic pyramid leh hlun hlui chhe tawhte hi Unesco World Heritage Site a ni a, ram chhunga khualzinte hipna hmun lar ber pawl a ni.
Police-te chuan he hmunah hian silai, hmanraw hriam leh silaimu an chhar a. Sheinbaum-i chuan chanchin thar a ngaihven reng thu leh Canadian embassy nen pawh an inbiak thu a sawi.
Social media-ah a security cabinet chu chhui chiang tur leh a tul ang puihna pe turin a hriattir tih a tar lang bawk.
“Vawiina Teotihuacán-a thil thleng hian min tina hle a, a tuar mi mal leh an chhungte rilru ka hriat thiampui tak zet a ni,” tiin Spanish tawngin a ziak.
Teotihuacán hi khawpui hlui, pyramid lian tak tak awmna a ni a, Aztec-ho hmaa awm a ni.
Nipuia Fifa World Cup an thlen turah khualzinte tan zan lama show ngaihven tak neihna tur hmun a ni dawn tih Mexican state sorkar chuan thla tir khan a puang.
Kumin kum tir khan sorkar chuan Jalisco New Generation Cartel-in an hruaitu, ‘El Mencho’ tia hriat, Nemesio Oseguera-a thah a nih hnuah khawpui tam takah buaina leh tharum thawhna thlen mah se inelna neih chhungin himnaah hlauhthawn tur a awm dawn lo niin an sawi.
Mexico-ah hian cartel-te tharum thawhna thleng fo mah se khualzinte kaihhnawih thil thleng a tlem hle.
World Cup inkhel hmasa ber hi June 11-ah Mexico City-ah Mexico leh South Africa ten an khel dawn a. Inelnaah hian ram dang mi maktaduai 5.5 vel an tel dawn niin Mexican thuneitute chuan an sawi a. Nipui chhunga inelnaah hian fan-te him nan venhim hna thawktu 100,000 vel dah an tum a ni.
Mexico hmun hluia inpawng kahnaah Canadian thi, 13 hliam
