Mexico president Claudio Sheinbaum

Claudio Sheinbaum chu hmeichhia Mexico president ni thei hmasa ber a ni ta a, hneh takia thlantlin a ni.
Mexico official electoral authority te chuan preliminary result tihchhuahah kum 61 a upa Mexico City mayor hlui chuan vote 58% atanga 60% a hmu tiin an sawi a.
A elpui ber sumdawng Xochitl Galvez aiin 30 percentage point velin vote a hmusang zawk a ni.
Sheinbaum hian a mentor leh President kalchuak tur Andres Manuel Lopez Obrador chu 1 October atangin a thlak dawn a ni.
Sheinbaum hi energy scientist ni thin niin a sorkar chuan Lopez Obrador hmalakna te a chhuznawm vek dawn tiin a sawi a.
A victory speech ah pawh, “Ka tihlawhchham hauh lovang che u” tiin a sawi. Amah thlawp tute chu mexico City main square Zocalo ah an pungkhawm nasa hle bawk.
Sheinbaum hi Mexico City mayor hlui niin Mexico rama political position pawimawh ber pakhata ngaih leh presidency kalkawng pawimawh bera ngaih a ni.
Sheinbaum hi a nu lama a pi leh pu Jewish te chu Nazis hlaua Bulgaria atanga Mexico a pem an ni a, politics a luhchilh hma in scientists hlawhtling tak a ni a. A pa lama a pi leh pu te chu Lithuania chhuak an ni thung.
A nu leh pa te pawh scientist ve ve niin Sheinbaum pawh hian physics zirin energy engineering ah doctorate a nei nghe nghe a ni.
California a research lab lar takah kum tam tak hun hmangin Mexican energy consumption zirchianna a nei a, amah hi climate change expert a ni bawk.
A tawnhriat leh student activism lama a inhmanna chuan Andres Manuel Lopez Obrador an Mexico City mayor nihna a chelh laiin environment secretary ah a ruat phah a ni.
Kum 2018 khan Mexico City a hmeichhia mayor hmasa ber nihna chelhin kum 2023 thleng apresident a chuh dawn avanga a ban thlengin chu dinhmun chu a chelh a ni.
Kumin thlanah hian hmeichhia ve ve Sheinbaum leh Galvez inkhing chuan Mexico ah hmeichhia te hmasawnna nasa tak a thlen tia sawi a ni a.
President bakah hian voters te chuan Mexico Congress member tur leh State pariata governor turte, Mexico City government leh local official sang chuang te thlanna an nei nghal bawk a. Kumin inthlanah hian tharumthawhna a nas ahle bawk.
Sorkar chuan inthlanna kaihhnawihah mi 20 chuangin nunna an chan an tih laiin survey dangah chuan nunna chan 37 an awm an ti thung.
Sheibaum elpui ber Xochitl Galvez chuan sorkar leh a tumpui Sheinbaum te chu Mexico tharumthawhna htleng nasaah demin a sawiselna hle a.
Thlan tlin a nih chuan ‘president huaisen ber, sualna tihre nana chetlak tak tak ngam’a intiam a, mahse chung pawikhawihnaa inhnamhnawih criminal cartel thiltithei tak tak te a nuaichimih tum dan kimchang erawh a sawsi thei chuang lo.
Mexico hian president chu kum ruk bak term khat chauh chelh a remti a, chuvangin kum 2018 atanga thuneihna chang tawh Lopez Obrador chuan a chuh nawn thei lo a ni. Obrador chu fak hlawh em em a nih avangin Sheinbaum a thlawpna chuan a dinhmun a tihthatphah nasa em em bawk.
Voter tam tak te chuan Morena programme hmanga retheihna umbo tumka hmalakna te Sheinbaum in a chhunzawm vek dawn a tih chuan thlawpna a hmuh tam phah bawk a. Tun hnai kum ruk chhungin Mexicans maktaduai chuang te chu rethei bakberh atanga khaichhuah nia sawi an ni.