MGNREGS a social audit neih thlirho
Social Audit Unit (SAU) Mizoram buatsaihin Thawhlehni khan MGNREGS hnuaia kumin December 10-a Mizoram khaw 301-a social audit neih zawh tak thlirlet a ni.
District tin district rural development officer (DRDO) leh Rural Development Block 18 atangin block development officer-te, assistant RD officer, additional programme officer-te leh official dangte an tel a ni.
SAU director C Laltleipuii chuan, social audit-in a tum ber chu, he scheme hnuaia hnathawh tur hrang hrang sawrkarin a duan chu a scheme-in a tum ang taka dik leh fel taka thawh a ni reng em, tih leh, engtiangin nge mipuiin an chhawr tangkai tih a hmuna endik a, thil felhlel awmte a tul anga siamtha a, bawhzui ngai bawhzui a ni tih a sawi.
Thutkhawmah hian kumin November 25 atanga December 10 chhunga MGNREGS hnathawh endik (social audit) zawh taka hmuhchhuah hrang hrang sawiho a ni a. Resource rerson-te report dan atangin, district leh block hrang hranga hma lak chhunzawm tur leh bawhzui ngai, siamthat ngai leh pawimawh awmte bawhzui zel dan tur sawi a ni.
MGNREG Act 2005 Section 17-na leh MGNREG Audit of Scheme Rules 2011 phut angin, sawrkar laipui Ministry of Rural Development hnuaia centrally sponsored scheme zawng zawngah Gram Sabha (vantlang inkhawm) hmanga social audit neih vek tura tih a ni a. Hmasawnna hnathawh hrang hrang leh social security scheme hrang hrangah Social Audit Unit Mizoram hian sawrkarin a bituk ang zelin social audit a kalpui zel a ni.
Mizoram pumah MGNREGS atan hian social audit vawi 3800 vel neih a ni tawh a. Kum 2012 atangin kumtina neih thin a ni a, kumin chhung hian a vawikhatna atan Mizorama khua awm zawng zawng (khaw 874) ah social audit neih chhuah vek a ni.
MGNREGS a social audit neih thlirho
