Social media-a hmeichhe zahawmna timualpho thei zawnga inlan leh thehdarh bakah naupang chunga chet dan kawngah dan khauh tak a awm avangin fimkhur turin mipui leh chhungtinte an chah thar tih Mizo Hmeichhe Insuihkhawm Pawl chuan an sawi.
MHIP Gen. Hqrs. thuchhuak chuan, social media a tha lo zawnga hman vanga hrem tawk tunhnaiah an awm fo ta chu pawi a tih thu a sawi a. Information Technology Act 67A-in a sawi angin sex video/ thlalak thehdarh kawngah account neitu in ama duhthu ngeia a thehdarh emaw mi sex video/ thlalak lo thehdarh sak emaw chu vawikhatnaah kum 5 thleng lung in tan leh cheng nuai 10 thleng chawitir theih; hrem nawn a nih chuan kum 7 lung in tan leh cheng nuai 10 thleng chawitir theih a ni, tiin, ‘Social media hman dik loh kawngah IT Act angin hrem theihna dan hrang hrang a awm a, khawvel thiamna hmangin police-ten rang takin an chhuichhuak thei zel tawh a, mitinte social media kan hman danah fimkhur turin kan inngen a ni,’ a ti.
Naupang chunga pawngsual, kutthlak leh khuaikhemna thleng hriat tur a awm ta zauh zauh reng tih sawi bawkin, ‘Pawikhawihtu chu kumtling lo pawh nise, Juvenile Justice Act 2015 hmangin hrem theih a ni a, kum tling a nih chuan POCSO Act 2012 hmangin kum tam tak lung in tan leh pawisa chawitir theih a ni. Hemi kawngah pawh hian fimkhur turin mipui kan chah a, nu leh paten kan tu leh faten pawi an khawih loh na’n nasa zawk a inzirtir thar leh turin chhungtin kan ngen a ni,’ MHIP thuchhuak chuan a ti.
MHIP-in fimkhur turin chah
