Mi hren ruang inhlanah Israel-Hamas inhnial, Gaza-ah puihna phur lut zel

Mi hren ruang inhlanah Israel-Hamas inhnial, Gaza-ah puihna phur lut zel
Hamas-in an mi hren zinga thi tawhte ruang an hlan chungchangah inrem lohna an neih avanga Israel leh Palestinian hel pawl inkara inkahhai derthawng tak a awm mek karah Gaza-ah puihna thil phur a lut leh ta a, Israel chu luhka pui ber, Rafah pawh hawn tumin a inbuatsaih mek bawk.
Israel hian Hamas-in ruang an hlan muan em avangin Rafah-a inkahpawhna khar chhunzawm leh puihna lutte tihtlemah a vau va, hei hian kum hnih indo tawhna tawp mek kal lai a tihbuai hlauhthawnna a siam hman.
Hel pawl hian Thawhlehni zan khan ruang dang an hlan belh leh tih Israeli venhim hna thawktu hotuin Nilaini khan a sawi a, Rafah pawh Gazan-te tan hawn tum a nih thu a sawi bawk a. Puihna phur truck pawh 600 a lut nia sawi a ni.
Hamas hian Thawhtanni khan Israeli an hren zinga thi tawh ruang pali an hlan a, Thawhlehni zanah pali dang an hlan leh a. Israeli thuneitute erawh chuan pakhat hi an mi a ni loh thu an sawi.
Inrem theih lohna dang tam tak an la neih karah ruang inhlannaa inrem lohna hi inkahhai puan mek tibuai thei dinhmunah a ding mek.
Israel hian Hamas-te hi an ralthuam an daha thuneihna an neih loh an duh a, hei hi lehlam hian an hnial a. Ralthuam chu dah lovin Israeli sipaite an inhnuhkir hnuah Gaza-ah an inlar leh tan a, mi thah leh chi bil helte nena intihbuai pawh an nei leh tawh.
Tuna a lan danah chuan inkahhai daih rei zawk a awma Gaza-a rorelna kal dan tur te, ram dang sipaiten venhimna an kalpui dan tur leh Palestinian-te tana ram din chu a la hla rih hle.
Gaza-ah hian mi hren ruang 21 a la awm a, an zinga tam tak chu indona avangin hmuhma a chhiat nasat em avangin zawn hmuh mai harsa tawh an ni.
Mi hrente ruang thleng nan hian Israel chuan Palestinian ruang 360 a hlan ve dawn a, Thawhlehni khan 45 hlan tawhin tute nge an nih pawh finfiah an ni tawh tih Palestinian health thuneituten an sawi.
Indona avang hian Gaza-a mihring dinhmun a chhe hle a, a cheng tam zawkin an in leh lo an chân a, tampui a thleng a, hriselna a hniam hle bawk.
Reuters-in video a dah chhuahah chuan Egypt atangin Rafah crossing-ah truck-ten Nilaini khaw var dawn khan Gaza an pan a, thenkhat hian tuialhthei leh puihna dang an phur.
Israel-a sorkar broadcaster Kan chuan Nilainia puihna lutte hi chawi, damdawi, tuialhthei, eirawngbawlna gas leh thil pawimawh zual siam thatna tur hmanrua te a nih thu a puang.
Egypt atanga Gaza luhna, Rafah crossing hi Ninganiah mipui tan hawn tan a ni a, European Union mission dah niin mipui veivahah khuahkhirhna a awm em tih erawh hriat a ni rih lo.
Tar lan tawh thin angin Israel leh Hamas inkara inkahhai hi US President Donald Trump-a rawtna anga kalpui a ni a. October 7, 2023-a Hamas-in Israel chhim lam beia mi 1,200 vel an thah leh hren tura Gaza-a mi 251 an hruai atanga indo niin Palestinian 68,000 chuang an thi hman a ni.