Lok Sabha inthlana an party candidate chu Zoram mipuiin ram tana mi huaisen a nih zia an hriat avangin hnehna an chan ngei a beisei tih MNF MP Election Campaign Directorate chairman Tawnluia chuan a sawi.
Thawhtannia MNF office Mizo Hnam Run inkhawmah Tawnluia chuan MP inthlana MNF worker-te, dan leh thupek kengkawhtute, MPF leh tlawmngai pawl chungah lawmthu a sawi a. MNF candidate lakah party an lungrual em em a, hmun hrang hrang atanga report an dawn danin beiseina an nei sang hle tih a sawi.
“Tun tum MP thlan khan kan party-ah tanrualna tha zawk a rawn pholang leh a. Kan ram kan hnam sakhua venhim hi MNF chuan kan thupui ber niin Mizo nationalism champion pui hi kan tum ber a ni. Kan candidate hi ram tana mi huaisen tak a ni tih mipuiin an hriat avangin hnehna chan ngei kan inbeisei a ni,” a ti.
MNF MP candidate K Vanlalvena campaign-na tur sum a nei lo a, hmun hrang hranga mahni sum senga feh chhuak zawng zawng chungah a lawm tih a sawi.
Nikum MLA inthlana MNF candidate vote lotu tam takin tun MP thlanah kha chuan amah an vote nia a hriat avangin lawmawm a tih thu sawiin, “Hmanni lawka tla hlim ni mah ila, kan party kan inlungrual tha a, tlin leh tlin loh chu Pathian thu thu ni mah se, beiseina sang tak kan nei. Ruling party khing kan ni a, opposition party hrang hrangin candidate kan nei a. Beisei ang kan lo pha ta lo a nih pawhin Pathian remruatah pawm thiam ang u,” K Vanlalvena hian a ti.
Mi huaisen a ni tih an hriat avangin hnehna kan beisei – Tawnluia
