Mi sual pawl chet nasatna Haiti-ah emergency puang
Haiti-a sorkar chuan mi sual pawl tharum thawhna a nasat em avangin an ram hmun thenkhatah thla thum chhung atan emergency a puang.
Emergency hi West, Centre leh Artibonite department huam chhung, Haiti-a ‘rice basket’ an tih lai hmuna puan niin heng hmunah hian tun hnaiah ralthuam kengten mi an beihna a thleng tam hle.
Inrinnia thuchhuah an siamah Haitian thuneitute chu ‘ram him lohna, lo neihna leh ei tur buaina beiin a kal zel dawn’ tih an tar lang.
Haiti-ah hian kum tam tak chhung mi sual pawl chak tak takte chetna a tam hle a, heng mite hi an rama politics leh sumdawng hotu lawkte nena inthlunzawm an ni thin a, ram zau tak an thunun.
July, 2021-a President Jovenel Moise-a thah a nih hnuah khan a nasa zual a, thuneihna inchuhna lian tak a awm zui.
Mi maktaduai 1.3 dawn baihvaiin an awm niin International Organization for Migration (IOM) chuan June khan a sawi a, UN pawhin October, 2024 leh kumin June inkarah mi 4,864 thah niin a sawi.
Mi sual pawl chetna titawp tur hian hma lak a ni reng a, UN-in a puih Kenyan police pawh tirh luh an ni a; mahse, nunphung a la pangngai thei lo.
Mi sualte hian 90% vel thuneihna an channa, an khawpui ber, Port-au-Prince chu an bitum deuh ber a ni thin a; mahse, tunah chuan ram chhung hmun dang an dap zau zel tawh.
UN human rights office chuan Artibonite leh Centre department-ah bik October, 2024 leh kumin June inkarah Haitian 1,000 chuang thah leh mi 620 ruk bo an awm niin a chhinchhiah.
April thla tawp khan mi eng emaw zat chuan Artibonite River hleuh kaiin mi sualte tlanchhiatsan tum an awm.
Sorkar chuan Zirtawpni khan Andre Jonas Vladimir Paraison-a chu Kenyan police tirh luhte nena thawkho mek, National Police-a an director lailawk atan a ruat thar bawk.
“Police-te hi kan chawl dawn lo,” a ti a. “Kil tinah vengtu kan dah dawn,” a ti.
Paraison-a hi a hma chuan National Palace-a head of security ni thin niin a chenna ina President Moise-a thah a nih lai pawh khan duty zingah a tel.
Mi sual pawl chet nasatna Haiti-ah emergency puang
