Inrinnia Prime Minister Narendra Modi-a’n thu a sawi chu inthlanna atana Model Code of Conduct (MCC) a bawhchhia nia sawiin civil servant hlui, zirna lama mi thiam, activist leh chanchinbu mite telin mi 700 chuangin Election Commission of India (ECI) hnenah lehkha an thehlut a, chhui chian leh action lak an phut.
April 20-a Chief Election Commissioner hnena complaint an thehluhah hming ziaktute chuan Doordarshan, Sansad TV leh All India Radio-a Modi-a thu sawi tihchhuahah MCC hman hun laiin sorkar thiltihnaa ‘inthlan lam hawi leh an party chet dan a tar lang’ niin an sawi.
Tunah hian Assam, Kerala leh Puducherry-ah te MCC hman niin April 9 khan vote thlak a ni a. Tamil Nadu (April 23-a vote thlak) leh West Bengal (April 23 leh 29-a vote thlak)-ah vote thlak a ni dawn bawk a. Heng assembly inthlanpui zawng zawngah hian May 4 hian vote chhiar a ni ang.
Complaint-ah hian hetiang thuchah thawnna atana sorkar sum hmanga chanchinbu hman a nih avangin rorel lai party chu ‘a theihna dik lo’ taka hmang, inthlan zalen leh felfai neih theihna tura pawimawh tichhia niin tar lan a ni.
MCC thupekte tar langin thehluttute minister-te chu sorkar thiltih leh inthlan leh party thila kaihkawp leh sorkar thil hman khap an nih thu an sawi.
Lehkhaah hian inthlan buaipuitute chu he thil hi hrechiang turin an ngen a, a thu sawi leh awm dante enfiaha a tul anga hma la turin an ngen a. Telecast neihna tur phalna pek hmasak a nih chuan political party dangte tan sorkar thu puan chhuahna thil hman dan inang vek pek an phut bawk.
Hming ziaktu zingah hian Delhi Lieutenant Governor hlui, Najeeb Jung, political economist Parakala Prabhakar, activist Yogendra Yadav, economist Jayati Ghosh, musician leh lehkhabu ziaktu T M Krishna, union secretary hlui E A S Sarma, activist Harsh Mander, chanchinbu mi Paranjoy Guha Thakurta, mi thiam Zoya Hasan leh ambassador hlui Madhu Bhaduri te pawh an tel.
Anni bakah hian transparency activist Anjali Bhardwaj, sorkar hnathawk thin Ashish Joshi, Amitabha Pande leh Avay Shukla, chanchinbu mi John Dayal leh Vidya Subrahmaniam leh CPI hruaitu Annie Raja bakah mi thiam, dan hre mi leh social activist eng emaw zat an tel bawk.
ECI-a lehkha thehluttute chuan commission chuan a dan anga ‘inthlan kalpui dan thianghlimna vawng nung turin’ rang taka hma a lak a ngai tih an sawi.
Mi thiam tak takten MCC bawhchhiaah Modi-a puh
