Nimina Council of Ministers thukhawmin agenda pakua an pawm zingah “Proposal for Implementation of Electrification of balance unelectrified villages/habitation in Mizoram under Revamped Distributions Sector Scheme (RDSS)” tih a tel a. RDSS hnuaiah Mizorama electric la luh thatlohna khuaa electric êng pekna tur chungchang a ni.
Central lamah Congress hun laiin India ram khua zawng zawng electric êng pek vekna tur scheme RGGVY (Rajiv Gandhi Grameen Vidyutikaran Yojana) kha 2005 atangin kalpui a ni a, 2012-ah chuan India rama thingtlang khua zawng zawngin electric power an nei vek hman tur a ni tih a ni a, mahse a hlawhtling hman lo a.
BJP hunah pawh chhungkaw tinte êng pek vekna tur scheme Pradhan Mantri Sahaj Bijli Har Ghar Yojana (Saubhagya) chu 2017 khan kalpui tan a ni a, March 2019 hmain 100% puitlin tum a ni, mahse hei pawh hi a la hlawhtling lo.
Saubhagya hnuaiah hian Mizoramin 2020-21 chhungin cheng vbch 11; 2021-22 chhungin cheng vbch 24 leh, kum 2022-23 chhungin cheng vbch 1 a dawng a, 2023-24 atan hian eng zat nge fund hi Mizoramin a dawn hriat hman a la ni lo.
Kum 19 chhung zet hma lo lak tawhnaah khan, khua zawng zawng electric êng pek kawnga Mizoram dinhmun chu 95.45% a ni; hei hi directorate of economics & statistics handbook 2022-in a tarlan dan a ni a, khua 725 zinga 692 chu electric êng pek tawh a ni.
Mizoram district 11 zingah Mamit (90%), Lunglei (91%) leh Lawngtlai (93%) te chu 100% la tlin lohnate a ni. Hetih rual hian, heng district-te hi khaw ngah district an ni. Lawngtlai district hian, 100% electrified village zinga khaw ngah ber Siaha let thum thuak khua a nei a; Lawngtlai-ah khua 169 a awm laiin, Siaha-ah chuan 70 a awm a ni.
Sawrkar thar hian sawrkar hmasate hmalakna chhunzawmin tunah hian RDSS hnuaia hmalak dan tur an rel ve leh ta a ni a. Sawrkarna an chan hlim khan power minister chuan sawrkar laipui dawr nghalin REC Chairman pawh a hmu a, Chairman hian 10% UC chauh pawh Mizoramin a thehluh chuan RDSS bikah chuan second instalment a lo release tur thu minister hi a lo hrilh tih te pawh hriat tur a awm nghal a nih kha. State lian dangte nen khaikhin ralah chuan Mizoramah hian khua a tlem hle a; mahse, state dang chuan 98-99% te an puitlin tawh.
Sawrkar hmasa ten 95.45% an lo thawh tawh chhunzawmna tur 4.55% la awm hi P&E minister hian tun term chhung hian a rawn puitlin thei dawn em tih mipuiin an thlir mek a, P&E minister chak leh chak loh tehfung tur pakhat a ni dawn a ni.
Mi zawng zawng tan electric êng pek
Prev Post