Mi zawng zawngin ZPM kan ngaihven thup – Lalliansawta

Mi zawng zawngin ZPM chu an tuipuiin an ngaihven thup tih an party president Lalliansawta chuan a sawi.
Zirtawpnia an party office-a inkhawmah ZPM president chuan inthlanpui vawihnih an hmachhawnnaah sawrkarna chan an beisei pha ta tih a sawi a. A party zawng chuan naupang hle mah se, ZPM a dintirh ngaihtuah letin, party hrang hrang awmkhawmin, politics-a la inhmang ngai reng reng lote, a then experience tam tak lo nei tawhte an awmkhawm a; buaithlak viau tura ngaih a nih laiin, buaina an nei reng reng loa, an kal dan chu a fuh hle tih a sawi a ni.
“Pathianin kawng min kawhhmuh kan zawh hi a fuh em em a, candidate kan puang hma ringawt pawh kha a ropui a ni. Thalai, naupang, taxi khalhtute leh mi chi hrang hrang, mi zawng zawngin ZPM kan tuipuiin kan ngaihven thup maite hi Pathian malsawmna leh enkawlna a ni,” a ti. Tlang hrang hrangah an party candidate-te ei hek loa, a petu zawka an tang chu lawmawm a tih thu a sawi bawk.
ZPM leader chu fakin, “Party leader tha tak Pathianin min pe a. Pa in a fate a enkawl ang deuh hian kan leader hi ka hmu a, a thawkrim em em a, pa nih a tlin takzet a ni,” Lalliansawta hian a ti. Result puan la ni lo mah se, sawrkar ngei an inring a, hetiang dinhmun hruai thlengtu Pathian hnenah lawmthu an sawi a, Pathianin a hruai tlat avangin lungrual takin an kal zel dawn tih a sawi a ni.