Midang tih phur nghak loa mahni intiphur turin chah

Zirlaite chu midang tih phur nghak loa, mahni intiphur thin turin minister B Lalchhanzova chuan a chah.
Nilainia MZP Hqrs. Mamit-in kumin HSLC leh HSSLC exam-a an huamchhunga zirlai titha an chawimawi chu B Lalchhanzova hian a hmanpui a. Ka thei ve a ni tih rilru kan put tlat chuan kan hlawhtling thei a ni tih hria in, beidawng loa bei fat fattu ni turin zirlaite chu a chah. Sap tawng kan thiam leh thiam loah buai lutuk lo tura chahin. Sap tawng thumal thiam tam tum a, chapo si loa mahni inngaihlu a, ngeiawm si loa inringtawk turin a chah bawk.
Mamit khawpui chhung leh a luhka kawngpui chu a theih ang anga siamthat deuh a nih theih nan PWD minister hnen ngenna lehkha ziah a tum tih minister hian a sawi a ni.
Zirlai titha lawmpuinaah hian Mamit bialtu MLA, Mamit district education officer Laldingliana leh MZP Gen. Hqrs. president H. Lalthianghlima te pawhin thu an sawi a ni.
Zirlai chawimawina hlante hi – HSLC-ah distinction-a pass 10, first division-a pass 26, an vaiin mi 36 leh; HSSLC-ah distinction-a pass 3, first division-a pass mi 36, an vaiin mi 39 an ni a. St. Francis of Assisi School Mamit hnenah ‘Best School Award’ hlan an ni bawk.