Middle East-ah Mizo tangkhang tam

Middle East-ah Mizo tangkhang tam
Middle East-a inbeihna chhuak mekah thlawhna service tihtawp a nih rih avangin ramdangmi tangkhang zingah Mizo pawh engemawzat an awm tih sawi a ni a. Mizoram sawrkar chuan theih ang angin a ngaihven reng tih a sawi.
Mizoram sawrkarin state dang leh ram danga Mizo awmte a tul anga ngaihtuahtu tura a din Mizo Diaspora Cell thuchhuak chuan, Middle East ram thenkhata thil awm dan thlirin, ram engemawzat chuan van boruak khuahkhirh – NOTAM (closure of airspace) an puang a, hei hian nasa takin thlawhna thlawk a tikhaihlak a. India sawrkar Ministry of Civil Aviation thuchhuah hnuhnung ber angin Iran, Israel, Lebanon, Saudi Arabia, Bahrain, Oman, Iraq, Jordan, Kuwait, UAE leh Qatar nena thlawhna hmanga inkalpawhna khar a ni tih a sawi.
Thlawhna service tihtawp rih a nih avang hian, Middle East ram thenkhat, a bikin UAE (Dubai) ah mipui tangkhang tam tak awm zingah Mizo engemawzat an awm tih hriat a ni tih sawiin, Mizo mipui Middle East ram lama tangkhang emaw tanpui ngai emaw tan Indian Embassy/ Consulate emaw Mizo Diaspora Cell emaw biakpawh theih a ni tih a sawi a ni.
Heng buaina huamchina awmte chuan passport leh visa copy, document pawimawh photocopy /soft copy neih that a, original a bo palh pawha backup copy kawlthat, phone number pawimawh bik mahni emergency contact chhinchhiah a, ziahchhuah a tangkai dawn tih a sawi bawk.
Middle East-a awm mek Mizote chiai mai loa, sawrkar thu ngaichang leh zawm tura ngen an ni tih Mizo Diaspora Cell hian a sawi a. An awmna rama Indian Embassy/ Consulate thuchhuah ngaichang a, awlsam zawka Mizoram sawrkar nen chanchin inhriatpawh theihna turin Mizo Diaspora Hub-a inziaklut turin an inhriattir tih a sawi a ni.
‘Chief minister enpuina in, Mizo Diaspora Cell chuan Middle East rama awm mek Mizote dinhmun a ngaihven reng a, an dinhmun thlithlai chungin hriat tur tul apiang inhriattir zel a ni ang,’ a ti.