US leh Israel tang dunin Iran an beihrawn mek a, India pawh tuialhtheia harsatna tawk thei a ni mek a. Inrinnia Iran beih tana an hruaitu lu ber, Ayatollah Ali Khamenei-a a thih hnuah Iran sorkar chuan khawvel puma tuialhthei leh boruakalhthei phurh hmun ngaa thena hmun khat kaltlangna, Strait of Hormuz chu an khar tih a puang.
Khawvel pum huapa lawng lian ber berte chu tuipuia an kawng tihtawpsak rih an ni a, Pathianni khan Oman bula tuialhthei phur lawng lian chu missile hmanga beih a tawk bawk.
Thuneitute erawh chuan India chuan tuikawng khar a nih avang hian hun rei lote chhung maia harsatna a tawk a rinawm loh thu an sawi.
February thla tir lam khan Oil Minister Hardeep Singh Puri-a chuan Rajya Sabha inkhawmah India hian tuialhthei chu ni 74 chhung daih a khawl thei tih a lo sawi tawh a, hei hian khawvel buaina eng pawh avanga mamawh zualpui chu a phuhruk thei.
“Kan dahkhawl hi cavern-ah chauh ni lovin kan thlitfimna hmuna mi pawh kan chhut a ni,” tiin Puri-a chuan a sawi a. “Cavern-a kan dahte hi Andhra Pradesh leh Karnataka-ah a awm a, Odisha-ah pawh bul tan thuai kan beisei a… Kan cavern leh kan thlitfimna hmuna awm sa leh kan lawngchawlhna hmuna kan lo lutte leh kan thil siamte enin ni 74 a daih thei a. Ni 90 pawh daih thei hial tur a ni a. Minister ka nih angin, ni 74 chin chu kan him a ni,” a ti a. “Hma lam pan zel turin kan ngaihtuah a ngai bawk,” a ti.
Ram chhunga tuialhthei dahkhawl sate hian ni 9.5 vel daih thei a ni a. Hei bakah hian tuialhthei hralh chhuaktu (oil marketing company)-te hnena thlitfim loh leh thlitfim hnua siam chhuah sa awmte chuan ni 67 chhung daih theihna nia chhut a ni.
NDTV-in oil economist leh Planning Commission member hlui, Kirit Parekh a kawmnaah, “US, Israel leh Iran inkara indona hi rei tak daih a nih chuan thlitfim loh man sang zel avangin thil tihziaawm nan India hian Russia atanga a lakluh a tihpun a ngai a ni,” a ti.
Khawvel puma hralhnaah thlitfim loh hi barrel khatah dollar khata a man to zawk a nih chuan India-in a lakluh senso chu dollar tluklehdingawn 1.4-in a pung thei dawn a. Ram pawn atanga a boruakalhthei mamawh zahve vel pawh a lakluh avangin a man a sang chho dawn bawk.
“India chuan Middle East-a indona hi US tan niin an sawi thei a; chuvangin, tuialhthei thlitfim loh man sang zel nawrna hmachhawn turin India chuan a energy mamawh phuhruk nan Russia atanga tam zawk lakluh a ngai dawn a ni,” a ti bawk.
Middle East indoin India tuialhthei mamawh nghawng thei
