MIFCO-in kum khat chhungin
leiba rul bakah nuai 14 a hlep
Mizoram Food & Allied Industries Corporation Ltd.(MIFCO) chairman Lalthazuala Rawite chuan, kum 2024-a a hna a zawm tirhin leiba an ngah hle a, theihtawpa hma an lak hnuah 2025 October an thlen chuan leiba an rul zoa, hlawkna cheng nuai 14 an nei hman tih a sawi.
MIFCO chairman hian Nilaini khan Sialhawk khuaa lakhuihthei chingtute kawmin an harsatna tawh leh hmalakpui dan tur a sawipui a, lakhuihthei chinna hmun hrang hrang a tlawh a. Hetah hian MIFCO leiba an rulh zawh tak thu leh hlawkna an neih tawh thu hi a sawi a. Lakhuihthei bakah Sapthei leh mipui ei tur sa thianghlim chenin an buaipui mek a, chini leh buhfai thlengin an buaipui tawh tih a sawi.
“Mizote hian ram pawna hralhchhuah tham tak tak thlai kan thar meuh loa, chutihlaia Sialhawk mipuiin innghahna leh eizawnna atan lakhuihthei in hmang mek hi a ropui a, sawrkar tibuai tham law law leh buaipui tak tak tham khawp tharchhuak zel turin duhsakna ka hlan a ni,” a ti.
Sialhawk khua leh a chhehvela lakhuihthei chingtuten harsatna an tawh thin, a hralhna kawngah sawrkarin kumin hian nasa zawkin a buaipui dawn a, chief minister-in a tuipui a, MIFCO hnuaia thawktu an tlem avang leh harsatna dang avangin an theih anga tam la turin an inbuatsaih a. Lakhuihthei kg. khat Rs.18-20 vela lei turin an inruahman tih a sawi a ni.
Sialhawk Pineapple Grower Society chairman J Rampanmawia chuan, kum 2025-ah Sialhawk-in lakhuihthei quintal 12000 an thar a, an chhut danin Mizoram puma lakhuihthei tharchhuah zaa 64 chu an khuain an thar. An thar tam ber tum, kum 2022 khan quintal 14000 an thar a ni. Kumin hian quintal 12000 vel thar leh an inbeisei tih a sawi. An lakhuihthei thar hi a hmunah kg.ah Rs.10-in sumdawngten an lei thin a; Aizawl Bazar, Champhai leh hmun dangah an hralh ber a. State pawn leh India ram pawn thleng pawhin an rawn dawr ve thin naa, a kalkawng a thuiin a senso a tam a, an hlawkpui lo tih a sawi.
MIFCO-in kum khat chhungin leiba rul bakah nuai 14 a hlep
