Sawrkar school zirtirtute chuan thil phut neiin lungawiloh lantirna atan April 21 atang khan badge dum an bel tan a. School Education minister chuan an tana department hmalaknaa an lungawi zo lo chu mak an ti hle tih a sawi.
Mizoram Government School Teacher’s Union (MIGOTSU) thuchhuak chuan sawrkar hnena an thil phut tih hlawhtlinsak turin an duh tih lantirna atana badge dum an belah an lungrualzia leh thawh ho thatzia a lang chu lawmawm a tih thu a sawi a. An ngenna hi sawrkar tan thil tih harsa a ni lo tih an ring a. Mipui sawrkar, a enkawl mipui ngaihtuah em emtu hian khawngaihna leh lainatna nen ro a relsak ngei an ring tih a sawi.
Chief minister kaihhruaiin School Education minister-in an thawhna school theuhah phur leh inpe taka an thawh zel theihnan an ngaihtuahsak a, an chinfel sak thuai an phut tih a sawi bawk.
MIGOTSU hi sawrkar enkawl school higher, high school leh middle school zirtirtute intelkhawm a ni a. Sawrkara thil phut neiin April 21-25 chhung lungawiloh lantirin badge dum bel an tum tih an lo sawi lawk tawh a ni.
Hetihlai hian School Education minister Dr Vanlalthlana chuan Thawhtannia ZPM office-a thu a sawinaah MIGOTSU-in bagde dum belin sawrkarah lungawilohna an lantir mek tih sawiin, “Education department-in theihtawp chhuaha an tana hma a lakna ngaihtuah chuan an lungawi zo lo hi mak kan ti hle. Dan awmsa in school upgrade tura a huam loh pawh an tel theihna tur dan kan siam belh mek a, an tana hma kan lakna hi ngaichang thiam se kan duh hle,” a ti
Sawrkar hmasa in an term tawp dawn lamah tlanchhe chungin school 180 chu sawrkar school-ah a puang a, dan behchhan tur awm loin school 52 chu provisional adhoc-a hlankai an ni a, lumpsum school awmsa leh a thar 108 an puang bawk tih minister hian a sawi.
“Upgradation atana school an chhawpchhuah thenkhat chu naupang nei lote, building pawh nei lote, thenkhat awm tawh lo (defunct) tawh leh khawtlang enkawl pawh ni lo private school-te an lo awm a; MLA inthlan awm tur thlir chunga an tih a nih avang khan a phuailuai hle,” a ti.
MIGOTSU thil phut:
8 Provincialisation revoke-na order sut leh
8 Provincialise-a upgradation enrollment criteria atana urban leh rural inang renga siam tha an ti lo
8 Middle school leh high school-a headmaster, kum 20/30 zet rules mumal tak hnuaia enkawl tawh, teacher-a an tlakhniam (stepdown) na tur dan cancel tura ngenna
MIGOTSU-in bagde dum bel ta An lungawi zo lo hi mak kan ti – Education minister
