Japanese Tomiko Itooka, kum 116 chu Guinness World Records-in khawvela mihring damlai zinga upa berah a puang. Tomiko hi May ni 23, 1908 a piang a ni a, a kum hi Gerontology Research Group-in an finfiah thlap hnuah GWR hian upa berah an puang ta a ni.
Tomiko hi Ashiya, Hyoho Prefecture, Japan-a nursing home-ah 2019 atang khan a awm a, kum 110 a nih thlengin a fanu te pahnih bulah a awm thin. Thla thum liamta khan a kum 116 tlin champha a lawm a, amah enkawltu te chuan a beng a chhet deuh tawh nain, engkim felfai takin a la titi pui theih niin an sawi. A chaw duh ber chu balhla a ni a, tuktin Calpis (bawngnute thur ang deuh) a in ziah bawk.
Tomiko ho Osaka a piang a ni a, unau pathum zinga a milai niin, hig school a kal lai chuan volleyball player tha pawl a ni ve thin. Kum 20 a tlinin pasal a nei a, fanu pahnih leh fapa pahnih neiin, tunah chuan tu leh tuchhuan thahnem tak a nei tawh.
Khawvel Indopui Pahnihna lai khan a pasal sumdawnna, textile factory a enkawl ve thin. A pasalin 1979 khan a thihsan a, chumi hnua pasal nei leh loin a hmeithai ta ngat ngat a, Nara Prefecture-ah chengin, Mt Nijo a lawn te chu nuam a ti thin hle a, metre 3,000 a sang Mt. Ontake pawh tum hnih a lawn chhuak tawh nghe nghe a ni.
Kum 80 a tlinin Saigoku Kannon Pilgrimage neiin, Buddist temple 33 tum hnih a tlawh chhuak vek a, a kum 100 tlin kumah pawh Ashiya Shrine-a lung step chho thui tak mai chu tiang hawl lovin a la kal chhuak vek thei bawk.
Nimin lawkah kum 117 mi Maria Branyas Morera a thi a, chumi hnuah Tomiko hi GWR-in khawvela upa ber title hi an pe ta a ni. Tomiko hi chhinchhiah theih china khawvel mihring piang tawh zinga damrei lama 24-na a ni mek a, damrei ber chu French Jenne Calment niin, kum 122 leh ni 164 a upa niin a thi.
Mihring damlai zinga upa ber Tomiko Itooka
