Mikhual Getafe laka tlawm Real!
Real Madrid hian tun season La Liga bikah si phurh hmasak an ngeih lo hle a, goal an chhuah hmasakna game-ah tum khat chiah tlawm an pumpelh a; Thawhtanni zanah pawh si an chhuah hmasa leh a, an khelmual ropui Santiago Bernabeu-ah first half minute 39-a Martin Satriano goal an chhuah chu hun pumin an sut zo lo a, Getafe lakah si khat faiin an tlawm!
Real hian khelh 26-ah point 60 neiin, hmahruaitu Barcelona nena an inthlauhna point khat leka dahkirleh tumna an puitlin zo lo a, anmahni ang bawka league season kal laia match li tlawm ve tawh Catalan team lakah point liin an hniam a, title race-ah Barca chan a tha leh ta sawt!
Goal awmchhun khungtu Satriano hian half-time dawnah Arambarri siamsak atangin Thibaut Courtois-a dan zawh loh goal khungin, he goal khat lek hi mualneitu team-in fans 65,104 pungkhawm hmaah an si phurh an sut zo lo a, a zawnin league-ah match hnih an tlawm tling ta!
Madrid hian nikum tawp lama a khup veilam a tihnat hnua la dam chiang hlei thei lo Kylian Mbappe kha Getafe an mikhual tum pawh hian an chhawr thei lo leh a, kum 27 mi tel loin Getafe tlarhnung khawng zet an paldarh zo lo a, Madrid tlarhma luahtute zingah mikhual goal-veng David Soria paltlang zo an awm lo!
Satriano goal kan hmuh hma khan striker Vinicius Junior chuan hmahruai theihna hun rangkachak bawhbelhin, Getafe keeper Soria chuan Brazilian goal tur hi a dansak.
Alvaro Arbeloa mangangin second half tir lam minute 10 chhungin substitution pathum a siam a, chu’ng zingah chuan chhuak am zingah Trent Alexander-Arnold a tel.
Chawlhlawk hnu hian Real goal bawh a na zual sauh a; Antonio Rudiger chuan goal hrulah a tauh chhuak a; substitute Rodrygo leh Dani Carvajal-te pawhin an hun remchang hmuh an hmangtangkai zo bik lo.
Hun pekbelh minute ngana a kal mek laiin Real Madrid buaina belh chhah turin an player substitute Franco Mastantuono chu referee Alejandro Muniz Ruiz laka tawngkam a thlahdah avangin hnawhchhuah a ni.
A hnu lawkah Getafe player Adrian Liso pawh hun khawhral luih avangin yellow card vawi hnihna hmu chungin hnawhchhuah a ni ve leh.
Tun kha kum 18 zet chhunga Real Madrid khelmual ngei maia Getafe chak vawi khatna niin, point 32 nen table-ah 11-na an luah.
A first team player pathum Kylian Mbappe, England midfielder Jude Bellingham leh Eder Militao-te inhliam vangin Real manager Arbeloa khan team a siksawi buaih a, rawlthar midfielder kum 18 mi Thiago Pitarch pawhin a vawi khatna atan senior team-ah luhhmasak a chang.
Bernabeu mipui lawm lo khan halftime laiin an team khelmual chhuahsan tur an boo khum ruih ruih a; Arbeloa chuan Dani Carvajal, Dean Huijsen leh Rodrygo-te luhtir bawk mah se hei hian danglamna a thlen teh ual lo!
Arbeloa hian Real Madrid boss a nih hnua match 12 a hmachhawn tawhah tum li ngawt a pawlte a tlawmpui tling ta a, hliam avanga a chhawr theih loh mek Mbappe leh Bellingham tel loa a team chakpui dan a zawn chhuah ran loha an hmelma lian Barcelona an hlat zui zel chuan a dinhmun hi a him hauh lo ang!
Madrid hian Zirtawpniah Celta Vigo an tum leh dawn a, a zawna league match vawi thum tlawm an duh loh chuan an insiamthat deuh hlek a ngaih hmel!
Mikhual Getafe laka tlawm Real!
