Milan khaw team chak leh chak lo
Inrinni zanah AC Milan-in sikhat faiin an mikhual Hellas Verona an hneh hram a; Pathianni zanah San Siro luahtu team dang Inter Milan chu Juventus khelmualah sikhat faiin an tlawm ve thung.
Stadio Giuseppe Meazza lama AC Milan chakna goal awmchhun hi minute 75-a Santiago Gimenez-a khung niin, Rafael Leao-a ball pek tha zet chu a tauhlut a; he result hmang hian point 41 neitu Milan hian Serie A table-ah pasarihna luahin, Champions League khelh phakna hmun hniam ber luahtu palina Lazio lakah point nga zetin an la hniam a; Verona chu 15-na an ni.
Milan hian first half-ah inkhel thununin, goal thun theihna hun remchang pawh vawi duai lo an siamchhuak a, mahse, tlarhnung ven lam buaipui lian zawk Verona an ding phui ve tlat a, an tum angin mualneitu team-in goal an khung mai thei bik lo.
Second half erawh game a dul angreng a, Milan pawhin chance an siamchhuak zung zung ta lo a, Gimenez-a goal awmchhun hmangin San Siro mipui 69,578 hlimna an pe thei hram a ni.
Juventus 1-0 Inter Milan
Pathianni Allianz Stadium chhunga mipui 41,361 pungkhawm hmaa mualneitu team chakna goal awmchhun hi second half laihawla Francisco Conceicao tihluh niin, season kal laiah Juventus hi league game 25 an khelh tawh atangin vawikhat chiah an la tlawm a, tun kha league-ah a zawna vawithum an chakna niin, point 46 nen table-ah palina an luah.
Inrinni inkhel dangah hmahruaitu Napoli chu mualneitu Lazio nen 2-2-in an inhnehtawk a, table-a pahnihna luahtu Inter Milan tan nikum September thla hnu lama inkhelh ni-a an hmahruai vawikhatna a ni thei dawn a, mahse, Turin khuaah Simone Inzaghi team-in point an hlawhchhuak zo lo a, point khat leka an thlauh hman Naples khaw team lakah point hnihin an hniam ta zawk a ni.
Tun kha season kala Inter vawithjum tlawmna ni tawhin, an game khelh hnuhnung vawithuma an vawihnih chak lohna a ni a, an match khelh hnuhnung vawiliah vawikhat chiah an chak zo.
Juventus khan Nilaini zan Champions League knockout phase play-off second leg-ah PSV Eindhoven an hmachhawn zui leh dawn a, first leg-a 2-1 hnehna an chan tawh avangin tlang zawk tura rinkai an ni mek.
Milan khaw team chak leh chak lo
