Miley Cyrus ‘Flowers’ chu Billboard Hot 100 (singles) chart-ah a No.1 a, he chart-a kar nga a No.1-na a ni ta a, he hla hi Radio Songs chart-ah No.1 ni bawkin, Miley hla zingah he chart-a No.1 thei hmasa ber a ni. Radio Songs chart hi kar khat chhunga US-a radio-ah hla ngaithlatu ngah dan atanga tehin chart ranking siam a ni. Hetihrual hian PinkPantheress leh Ice Spice te pawh Hot 100 chart top 10-ah a vawi khat nan an lang ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre U.S. streaming (official audio leh official video), radio airplay leh sales data te chu tehna pawimawh a ni.
Miley ‘Flowers’ hian radio airplay-ah ngaithlatu maktaduai 85.8 nei angin an chhut a, stream maktaduai 33.7 leh sales 22,000 nen, chart-ah a kar nga nan a No.1 leh ta a ni.
SZA ‘Kill Bill’ chu No.2-ah bawk awm lehin, kar ruk chhung No.2-a a awmna a ni ta a, Metro Boomin, The Weeknd leh 21 Savage “Creepin'” chu No.5 atangin No.3-ah a insawn ve ta bawk.
PinkPantheress leh Ice Spice te hla ‘Boy’s a Liar Pt. 2″ chu stream maktaduai 31.1, leh sales 1,000 tlingin, radio airplay-ah ngaithlatu maktaduai 2.1 a nei bawk a, hei hi chart-ah No.14 atangin No.4-ah a invawrh kai pui ta a ni. He hla hi PinkPantheress original solo ‘Boy’s a Liar’, nikum November a tlangzarh tawh, remix a ni a, PinkPantheress leh Ice Spice te tan he chart top 10-a an lan vawi khatna ve ve a ni.
Morgan Wallen ‘Last Night’ chu No.3 atangin No.5-ah a tawlh a, chart No.1 hlui Sam Smith leh Kim Petras ‘Unholy’ chu No.4 atangin No.6-ah a tawlh a, Thw Eeknd ‘Die for You’ chu No.8 atangin No.7-ah a insawn a, chart No.1 hlui Taylor Swift ‘Anti-Hero’ chu No.7 atangin No.8-ah a tawlh a, Beyonce ‘Cuff It’ chu No.6 atangin No.9-ah a tawlh a, David Guetta leh Bebe Rexha “I’m Good (Blue)” chu No.9 atangin No.10-ah a tawlh ta bawk.
Miley Cyrus ‘Flowers’ a la Hot ber
![](https://theaizawlpost.org/wp-content/uploads/2023/02/mi-1.jpg)