Zirtawpni zing khan NBA 2024-25 khelh chhunzawm a ni a, vawi ruk zet tlawm zawn tawh Milwuakee Bucks chu Utah Jazz lakah chakin, hnehna an chang ve ta nge nge. Zirtawp zinga inkhel dangah Minnesota Timberwolves in hnehna an chang ve bawk.
Season thara khel tha lo tak, an khelh hnuhnung vawi ruka tlawm vek Milwuakee Bucks hian Utah Jazz hneh ngei tumin tan an khawh a, bul pawh an tan tha viau. Quarter khatnaah point hnihin an chungnung nghal. Bul tan tha mah se quarter hnihnaaah Jazz er let an tuar lo thung a, point rukin an hnufual a, point li a hnufual zawk chungin chawlhlawk an hmang.
Hnufual zawk chungin chawlhlawk hmang bawk mah se chawlhlawk hnu lamah an khel tha ta viau thung a, quarter hnuhnung pahnihah chungnung zawk an ni ve ve. Quarter thumnaah point 19 zetin an sang fal ta mai a, an khingpuite an lehthal chiang hle. Point 17 zeta hma an hruai hnuin quarter hnuhnung berah point 12 zetin an chungnung zui leh a. Utah Jazz lakah hian point 123-100 zetin hnehna an chang zui ta a ni.
Jazz laka an chak tum hian Bucks player pawimawh Damian Lillard chuan 34 a thawkchhuak a, Giannis Antetokounmpo chuan point 31 a thawkchhuak ve bawk. Lillard leh Antetokounmpo te hian quarter hnuhnung berah point 31 zet an thawkchhuak a, ball sawh let vawi 16 zet an dawng tling bawk.
Zirtawpni zinga inkhel dangah Minnesota Timberwolves chuan an khingpui Chicago Bulls chu point 135-119 zetin an hneh ve bawk. He inkhelah hian Timberwolves tan Anthony Edwards chuan point 33 ngawt a thawkchhuak a, hei hi season kal meka a point thawhchhuah tam ber a ni nghe nghe.
Milwaukee Bucks an chak ve ta hlawl
