September ni 30-a Mim Kut hman turah, Mizoram Merchant Association chuan an member-te chu September ni 27-30, ni li chhung Kut pual special discount siam theuh turin a ngen a. Hetianga sumdawng pawlin mipui tana luanchhuahna hun an siam hi a lawmawm hle a ni.
Hemi denchhen hian mipui lam pawhin ‘bazar run pui’ te pawh an nei duh ngei ang a, nakin hun zel atan pawh, sumdawngte leh mipuite inkara indawrtawnna tha zawk leh hlawk zawk a lo pian chhuah theih a rinawm a, a zuartu leh a dawrtute tan malsawmna ni tawn thei se a duhawm hle a ni.
Tunhma deuh khan, Krismas leh Kumthar vuakvetah, miin an lei ngei ngei dawn tih hriat lawkna avangin bungrua leh thawmhnaw man kha a chang chuan a to zawk hlauh thin a. Hun a lo kal zel a, online marketing a lo chhuak a, puja discount avangin Mizorama sumdawng thenkhat chuan ‘discount’ an uar chho ve ta a. Tunah chuan kan state chhung ngeiah Online marketing a lar chho leh ta hle. Mizorama sumdawngte hian thawmhnaw leh bungrua etc. hi an zuar to thei hle a, chu chu phai rama han kal hian phat rual lohvin a chiang mai. Chutih hnu ahmanah, MRP chawk chhiaa a aia sang zawk ziak hnan duhte an la awm thin a. Consumer Union leh Legal Metrology lamin nasa taka hma an lakna azarah a ziaawm chho leh ta viau a. Dawr tê thenkhatah chuan, ‘MRP-in kan la a, a aia sanga kan zawrh loh chuan hlep kan nei ve lo’ tih tanchhanah an hmang thin, chhuanlam dawrawm ta a ni a, MRP awmzia hi mipui nawlpui hi chuan kan hrechiang tawh.
Vishal Mega Mart kan lo hmachhawn dan te kha, thil zahthlak angreng tak a ni; mahse, kan nihna leh dinhmun mil tawk a la ni a tih theih mai awm e. Tunah chuan kan sumdawngte hian marketing competition hmachhawn dan an thiam chho ve tan ta a, Vai ram dawr turte an man beh thiam poh leh sumdawngte hi an nihlawh mai dawn tihna a ni.
Kan hmachhawn mek hun pui Krismas leh Kumthar vuakvetah te pawh hian, sumdawngte hi nasa zawkin customer tan han luangchhuak ve leh se, state pawna chhuak lova kan state chhunga kan sum leh paite kan vir kualtir (circulate) tam poh leh, kan state economy pawh a thang ve zel dawn tihna a ni.
Mim Kut discount leh a behbawm…
