Mizoramah sumdawngten an mi chhawrte tana sawrkarin Labour Law hman turin a ruahman niin sumdawng pawl inzawmkhawm chuan an sawi a. Hei hi an duh lo tih an sawi.
Mizoram Merchant Association (MIMA) thuchhuak chuan tunhnaiah Council of Minister thukhawm chuan Shops and Establishment Acts leh minimum wages hman chungchangah LESDE department-in proposal siamin a ngaihtuah nia an hriat thu sawiin, ‘Hei hi Labour Law chiah a ni,’ a ti.
Labour Law hman chu Mizo hnam kalzelah tha lo a tih thu sawiin, sawrkar kal tawhah pawh MIMA ngaihdan la in tun thlengin hman a la nih loh thu te, state dangah pawh proprietorship angah chuan hmang an la awm loa, factory lian, insurance company, private bank, private hospital lian adt ah chauh hman a nih thu te a sawi.
‘Law Court-a inkhinte, hnathawh mamawh hun lai taka kar neiha nawrh huaihawtte, hnathawh hun laia danin a phalsak anga chawlh lak leh a dang thil tam tak thleng tawh leh thleng mek a awm a. Ngun taka ngaihtuahin, sumdawnna kawnga kan hnam kal zel tur ngaihtuahin, ti lo turin sawrkar kan ngen a ni,’ MIMA chuan a ti.
MIMA sawi danin, Labour law hmannaah chuan kar khatah ni khat leh a chanve chawlh ziah, kum khat chhunga chawlh khawl theih anga chawlh pek zat awm leh chawlh pekte a kengtel a. Doctor certificate hmanga medical leave pek theih a ni, tiin, hei hi hman dik loh a awm theih bakah an hnathawk zinga damlo dik tak chu chawlh an pe thin tho tih an sawi.
Sawrkarin Labour Law hnuaia thuneitu a ruatte phalna in hnathawktute hi kum khat chhunga ni 90 chawlh phalsak an nih bakah casual leave pek a kengtel a. Ni 30 chin engemaw rokhawlhna avangin sawrkar ruat thuneitu hian chawlh a pe thei tih an sawi bawk.
Labour law-in a phalsak angin firm pakhata mi 7 thawk chin chuan association an din theih anga, nawrh phalsak an ni a; central leh state sawrkar chawlh apiangin chawlh pek theih a ni a; thil bo leh rinawm loh chungchanga hnathawkte evidence awm a nih loh chuan ban mai mai theih lohte leh ban dawn chuan thla 6 hlawh pek ngai, tih te a awm tih an sawi.
MIMA chuan a theih angin a tul nia a hriatte hnenah Labour Law hman a nih lohna tur hian an thlen tawh a, chief minister an hmuh heih hnuah kal zel dan tur an rel dawn tih an sawi a ni.
MIMA-in Labour law hman duh lo
![](https://theaizawlpost.org/wp-content/uploads/tap_logo-min-large.jpg)