Mimi Renthlei music video thar nen rawn comeback dawn
‘Lunglen’ khan lunglen a hnêm thin, tunah a hla thar ‘Ka Mawi Ve Em?’ tih nen Mimi Renthlei a rawn inlan leh dawn ta a, a music video a peih fel tawh a, “Tihchhuah hun tur tak hi ka sawi thei mai lo, ka rawn tichhuak deuh thut dawn,” a ti.
‘Ka Mawi Ve Em?’ tih hla hi Mimi phuah niin, ani hian a hla sak tur pawh a lo phuah nual tawh a, a hla hit ‘Lunglen’ pawh kha a original niin, a hla phuah pariat vel chu a sa chhuak tawh. Pasal neiin, chhungkhat nu ber a nih hnuah a thawm a reh deuh vang vang a, mahse, tunhnaiah rimawi khawvelah a rawn inlan leh tan deuh a. Mimi chuan hetianga rimawi lama a rawn inlan leh hi a duh leh tum ve hrim hrim vang lam pawh ni lovin a hun tawnin a rawn hril niin a sawi.
Mimi chuan, “Keima duh vang lam pawh a ni lo, programme hi a rawn inchhunzawm zut mai a, Pathian zarah naute pawh a lo lian ve ta deuh bawk a, buaipui em em a ngai tawh lo a. Programme te a rawn awm ve zel a, ka ti chho ve ta zel a nih hi. Mahse, engtia rei nge a daih dawn a hriat loh, mahse, zai hi nuam kan ti ve a,” a ti.
Mimi hian rimawi lamah hmalakna dang te pawh a nei ve neuh neuh a, Tribal Power, Jauvi leh Lilac te nen pawh project an nei niin thu kan dawng a, MZU Virthli leh Chapchar Kut-ah te pawh Mimi Renthlei performance kan hmu thei dawn e.
Mimi Renthlei music video thar nen rawn comeback dawn
