ZPM sawrkar sawisel leh beitute chu chi hrang hranga then theih an ni a, ram hmangaihtu tak takte sawiselna chu huata la loin, insiamthatna hmanruaa hman thiam a ngai tih adviser to chief minister Er Ginzalala chuan a sawi.
Thawhtannia an party office-a inkhawmah ZPM MLA Er. Ginzalala chuan, an party indin tirh atanga tun thlengin kuthnathawktute dinchhuahna chu an din chhan a la ni reng a. Pathian zarah rorelna an chang a, beihna pawh kan tawk chho ve ta zel a, hengte hi dawnsawn thiam a ngai hle tih a sawi.
“Sawiselna zawng zawng kan haw tur a ni lo. Min beitute hi chi hnih chi thum lai an ni thei a, a then chu kan party tana thahnemngai tak leh ram hmangaihtu tak tak an ni thei. Hengho hian thil dik ti turin min beisei a, min zilh a ni. Thenkhat erawh min ertu leh min hawtu an ni thei a, a dawnsawn danah Isua zirtirna hrerengin ringtu kan nihna lantir a pawimawh a, insiamthatna hmanruaa kan hman thiam a ngai,” a ti.
ZPM policy laimu chu sustainable development a ni a, mimal hnena sum leh therhlo tlemte te insem chu a sustainable lo tih adviser to CM hian a sawi a. Bung thar kai turin an inbuatsaih a, party mite pawh kalphung thar an aupui ang ngeiin an intih thianghlim a ngai tih a sawi.
“Engkim hi vawi leh khatah a thar vek thei loa, chutih laiin min beitute chuan engkim thar nghal vek turin an beisei a, hengte hi chu politics ruihchilhte an ni,” a ti. Kan ram politics chu a lo bawlhhlawh hman hle nia sawiin, kuthnathawktuten rim takin thawk mah se, intodelhna leh hmasawnna tak tak an hmu thei loa, ram rorel dan a dik lo tih hriain mipui pawhin loh theih lohin politics an ngaihven a tul ta tih a sawi. “Politics kalphung tharah beiseina thar neiin phur takin hna an thawk a, an beiseina hi kan ti beidawng thiang loa, kan mawhphurhna a sang hle a ni,” a ti.
Min beitute huat vek tur a ni lo – Er Ginzalal
