Kan ram, kan hnam leh kan sakhua humhim turin regional party chu an rintlak tak tak loh tih Congress president Lalsawta chuan a sawi.
Inrinnia Aizawl South-III huamchhung Falkawna an party-in hun an hmannaah MPCC president chuan kum tam tak central sawrkara Congress party vangin India leh Mizoramah sakhaw zalenna neiin kan hlim em em a, kum 2014 atanga central-a BJP a sawrkar chinah sakhaw zalenna chungchangah harsatna kan tawk tan, tiin a sawi. “Kan missionary leh kohhran lu te an chep tan a. Kum tam tak hnu ah he ramah hian Kristian an awm ve thin, tih tur dinhmuna min siam tumin kam ramah ngei Hindu lal ram din an tum a ni,” a ti.
Kan ram, kan hnam, kan sakhua humhim turin tualto party an rintlak loh tih sawiin, “Kristian-te leh hnam tlem zawkte nuai chimih tumtu BJP chu Mizorama regional party-te hian do duh mah se, an thei lo. CAB pawh kan do ti chungin House-ah an thlawp thu an sawi leh mai. Congress erawh national party, sakhaw zalenna champion pui reng leh champion pui reng tur party a ni,” a ti
BJP chu an duh tihhlawhtlin an tumna kawngah zah leh pawisak an nei tih Lalsawta hian a sawi a. State chungnung bik Jammu & Kashmir pawh union territory ni phak loin a rapbet hmiah tih a sawi. “Pawisak nei lo BJP leh a thawhpuite kuta ram hruai hna hlan hi a theih loh. Kan ram, kan hnam leh kan sakhua humhim turin kohhran, NGO leh party dangte tanho a ngai takzet,” a ti.
Min humhim turin tualto party an rintlak loh – Congress president
![](https://theaizawlpost.org/wp-content/uploads/tap_logo-min-large.jpg)