Sawrkar laipui dawra Delhi-a cham mek AH & Vety minister C Lalsawivunga chuan Thawhlehni khan Union minister for Fisheries, Animal Husbandry & Dairying Rajiv Ranjan Singh; minister of state George Kurien leh Union minister for Minority Affairs Kiren Rijiju te bakah ministry-a secretary leh official pawimawh dangte hmu in Mizoram mamawh a thlen.
Union Minister for AH & Dairying hnenah hian kum 2023- 2024 chhunga Mobile Veterinary Unit (MVU) staff te hlawh tur sawrkar laipuiin zaa 25 chauh a pek avang leh MVU staff-ten October 2023 thleng chauh hlawh an lak avanga an nawrhna, African Swine Fever (ASF) avanga state tawrhna leh ASF zangnadawmna chungchang a thlen. Mizoram chu ruahtui tlak tamna a nih avanga sawrkar laipui vaccination schedule anga a kal ve theih loh dan a sawifiah bawk.
MVU hlawh chungchang chu revised proposal siama thehluh hunah an lo pawmpui tur thu Rajiv Ranjan Singh hian a sawi a. kumin 2024- 2025 chhunga MVU staff-te hlawh tur zaa 25 sanction nghal a ni. Hmarchhak state tana vaccination schedule hran siam dan tur ngaihtuah a nih thu leh, ASF zangnadawmna chungchang pawh an ngaihtuah zel tur thu a sawi. Check post tam zawk siamna turin NADCP (National Animal Disease Control Programme) scheme hmang tangkai turin a chah bawk.
Ministry of Panchayati Raj miniter ni bawk Ranjan Singh nen hian Local Administration Department mamawh an sawi dun a. Mizoram LAD minister C Lalsawivunga hian village council-te enkawlna atana central scheme – Rastrya Gram Swara?j Abhiyan (RGSA) chungchang thlenin, 2024- 2025 atana central-in budget a pawmsak cheng vaibelchhe 103.11 atanga 50% chu RGSA guidelines anga pechhuak sak thuai turin a ngen.
Hei hi Union minister hian pekchhuah sak thuai a tum tih a lo hrilh a. He scheme hnuaiah hian VC House sakna tur, thingtlang khuaa Common Service Centre dinna tur, VC-te khawtlang rorelna kawnga an thiamna leh hriatna tipung tura training pekna tur fund, District Panchayat Resource Centre sakna tur leh thildang pawimawh a tel. Heng bakah hian VC-ten khawtlang hmasawnna hna an kalpuina tur Rural Local Body Grant chungchang an sawidun bawk.
Union minister Kiren Rijiju leh Minority Affairs secretary Dr Chandra Shekhar Kumar hmu in, Mizoram atanga PMJVK hnuaia project thehluh ho a sawipui a. Union minister hian Mizoram atanga project thehluhte a ngaihpawimawh thu leh theihtawpa hma a lo lakpui zel tur thu a hrilh.
Minister a department mamawh thlen
