Budget Session neih meka health minister thil sawi chungchangah thil chiang lo a awm a, a chhanna kha House proceedings-a ziah luh tur chi a ni em tih thu pawh hriatthiam a har tih thu dawn a ni.
February ni 22 khan zawhna leh chhanna hunah health minister hian a chhanna tura ziah sa a chhiar zawhah a sawi belh a, finance changtuin chhang zawk se tiin a kian bawk.
Session-ah hian zawhna leh chhanna (starred question) hunah member-te zawhna thehluh sa leh a chhanna hi ziakin a awm thin a, chuta thu inziak chu a zawttuin a chhiar a, a chhangtu pawhin a chhanna tura ziah sa chu a chhiar thin. Chu chu member-te hnenah sem a ni a, chanchinbumite hnenah pek a nih bakah website lamah dah a ni bawk. Zawh belhna a awm chuan a tlachawpin an inzawtin an inchhang tawh thin.
February ni 22-a zawhna chu, a zawttuin a chhiar zawhah a chhangtu tur health minister chuan a chhanna tura ziah sa chhiarin a chhang a, ziah sa bakah sawi belhin, “SEDP atanga forty crore bik kha chu, kan finance minister hian a sawifiah thiam zawkin ka ring a, Pu Speaker, i remtih chuan amah hian min sawifiahsak ta mai se, ka lawm e,” tiin finance changtu a kian zui a ni.
Session-a an thil sawi, an tawngkam zawng zawng hi ziaka dah thin a ni a, health minister chhannaah pawh hian a chhanna tura ziah sa, member-te hnena pek tawh chin chauh kha nge an ziah luh dawn tih leh, a thil sawi belh kha ziah luh tur tho a ni em tih hriatthiam a har tih thu dawn a ni.
Minister chhanna chungchangah thil chiang lo
