Minister hlui leh MNF hruaitu ni lai Lalruatkima thusawiah dan pawisak lohna, sawrkar hnathawkte hmuhsitna rawngkai a sawi tih ZPM party chuan an sawi.
ZPM Thalai Hqrs. thuchhuak chuan MNF treasurer Pu Lalruatkima hian ZPM sawrkar chu sawrkar hnathawkte nekcheptu, aikal lak khap, office tan hun leh ban hmaa chhuahsan phal lo leh an awmna chin hriat theihna apps hman tan an tumnaah sawrkar hnathawkte an beidawng a, MNF sawrkar leh hun an nghakhlel hle, tia a sawi thu sawichhawngin, a ngaithlatu mipui tan a hrilhhaithlak dawn hle ah an ngai a. Minister hial lo ni tawh tawngkam atan chuan thil mawi lo leh inhmeh lo tak nia an ngaih thu a sawi.
‘Mizoram (MNF) sawrkarah minister nihna hial lo chelh tawh a ni a. Hetiang dan pawisak lohna chungchang a sawichhuak hi MNF sawrkar laia department a chan thinah khan dan zawm kawngah a lo ngaihtuahawm thin zia a pholang chiang hle ah kan ngai,’ a ti.
ZPM sawrkarah thahnemngai taka sawrkar hnathawkte an thawh lai a, dan pawisa lo tura fuihpawrh chu MNF party-in sim se an duh tih ZPM Thalai hian sawiin, sawrkar hnathawk, mipui rawngbawlsaktute rilruah rinawm lohna leh zelthelna tuhsak duhna thinlung MNF hruaitu leh minister hial lo ni tawh chuan pu lo se, office kalphung dan leh dun hriat kawngah leh dan pawisak lohna ata harhchhuak turin an ngen tih a sawi a ni.
ZPM Gen. Hqrs. pawhin thuchhuah siamin, ram hruaitu lo ni tawh leh ram tana mi thahnemngai tak ni tura ngaihin hetianga thu a sawi ta mai chu a hruai mek party a timualphoin, sawrkar hmasa mawnghlimna a nih bakah an hunlaia kalphung duhawm lo tak a lailang chiang hle tih a sawi.
‘Sawrkar hnathawkte hi mifel leh rinawm tak tak, ram tana ngaihtuahna, tha leh zung seng thintute an ni a; mi tam tak kohhran hruaitu, khawtlang tana mi tangkai leh sawrkar hmalakna a hlawhtlin theihna tura a taka thawktu an nih mek lai a, hetianga rilru pamham pu anga ngaih theih tura minister lo ni tawhin a sawi ta mai hi a pawi hle a ni,’ a ti.
Minister hlui thusawiah dan pawisak lohna lang – ZPM
