Minister hoin scheme kalpui thlirho

AH & Vety minister C Lalsawivunga chuan an department hotute chu Thawhtanni khan scheme an kalpui mek chungchang a sawiho pui.
Minister chuan AH & Vety department chu ran vulhtu tanpui ngaite tanpuitu an nih angin thahnemngai turin a fuih a. Ran vulhtuten harsatna an tawk a nih pawhin a ranglama mahni theihna zawnah hma la thuai thin tura chahin, hemi kawngah hian Directorate leh district lam pawhin uluk zawkin zirtir se a duh tih a sawi a ni.
Ranchaw lama harsatna tawh thin chungchangah chak taka hmalak a ni tih a sawi a. Ranchaw (fodder) tam zawka kan tharchhuah theihnan Mizoramah ranchaw chinna tur hmun remchang zawng turin hma lak a ni dawn tih a sawi.
Ran insurance tha tak awm tawh chu District leh Block-ah inhrilhhriat zel nise, ran vulhtuten tangkai taka an hman an duh sak tih a sawi bawk,
Sa leh artuia Mizoram intodelh theihna kawngah department-in mawh a phur thuk hle tih AH & Vety minister hian a sawi a. Mahni awmhmun chauh duhtawk loa, zin chhuaka ran vulhtute hmun ngeiah an harsatna hriatpuia theihtawp chhuahpui turin a fuih.
Sawihonaah hian secretary Lalsangliana’n department hmalakna hrang hrang a sawi hawng a. Scheme khawihtu nodal officer-ten an thlen chin leh hmachhawp an report a ni. He hunah hian Secretariat leh Directorate atangin officer 27 an tel.