New Delhi-a sawrkar laipui hotute dawrtu minister Lalnghinglova Hmar chuan Nilaini khan minister of state for Minority Affairs John Barla a kawm a. Mizoram chu ‘minority’ awmna a nih angin ngaihsak a tul bik dan leh, ministry hnuaia hamthatna awm theiah hmaih lo turin a ngen.
Central minister chuan Mizoram an ngaihsak thu leh an ngaihsak zawm zel tur thu a sawi a. A ministry hnuaia scheme awm atanga duhsakna an pek thin thu leh project a tam thei ang rawn thawn zel tura a duh thu a lo sawi a ni.
Excise & Narcotics changtu Lalnghinglova Hmar hian minister of state for DoNER BL Verma pawh kawmin, Mizoram chu ramri hrula awm a nih avangin ram pawn atangin ruihhlo leh phal loh thil dang a lo lut nasa a, hemi dona kawngah hian Excise & Narcotics Department thuam chak a tul tih sawiin, state budget pawnlama puihna awm theite dappui turin a ngen.
Central minister chuan state mamawh ziaka thlen turin a lo hrilhin, a office atanga tih theih awmah tlanchhiat a tum lo tih a sawi. DoNER ministry chu hmarchhak bial tana ding, hmarchhak mipui tan a ni a, a tul anga tlan kual tura a inpeih thu a lo sawi a ni.
Sports & Youth Services minister Lalnghinglova Hmar hian Ningani khan Ministry of Youth Affairs and Sports-a Youth department secretary Meeta Rajivlochan a kawm a. Mizoramin sports lam a hmelhriat that viau laiin, Youth Affairs lamah tan lakna tur a ngah tih sawiin, hemi kawnga tan lakpui turin a ngen. Mizorama lo zina state dinhmun a taka hmuhpui turin a sawm a ni.
Youth Affairs hnuaia Mizorama Youth Hostel awmte chu a building a hlui tawh a, sak that a hun tawh tih a thlen bawk a. Meeta Rajivlochan hian thalaite tana Ministry of Youth Affairs & Sports-in programme a siamte hmang tangkai turin Mizo thalaite a sawm a, inziahluhna tura siam mitin ban phak – mybharat.gov.in chu hmang tangkaia inziaklut turin a ngen a ni.
Minister-in centre hotute dawr
