Minister-in hmel hmuh nuam pu turin department thawktute chah

Minister-in hmel hmuh nuam pu
turin department thawktute chah
Land Revenue & Settlement department-a thawktute chu anmahni dawrtute tan hmel hmuh nuam pua hawihhawm turin an minister B Lalchhanzova chuan a chah.
Land Revenue & Settlement department hotute hi an hnathawh thlirletin January 10 khan an thukhawm a. LR&S Secretariat, Directorate officer leh sistrict hrang hranga settlement officer-te an tel. Minister chuan department-a thawktu chu sulhnu felfai leh entawntlak nei tura inzir peih leh intuaihriam reng peih turin a chah a. Department hnuaia an mawhphurhna theuhah mi rintlak leh rawntlak nia kum bul atanga tan la turin a fuih. Thil dik tawk lo, chinfel ngai nia an hriatte chu midangin an lo enliam thin vang maia hmu lo dertu nih chu buaina leh harsatna lian zawk thlen thintu a ni fo tih sawiin, “Thil tha ti tur chuan buai leh mualpho ngama hma latu nih tum theuh ang u,” a ti.
Ram teh leh felfai taka chhinchhiah hna kalpui chungchangah mipuiin Revenue department lakah beiseina sang tak an nei tih sawiin, mipui beiseina tihlawhtling turin mahni mawhphurhna theuh tha taka hlenchhuak turin a chah. Land Revenue & Settlement department chu dawrtu ngah tak department a nih angin, anmahni dawrtute hmachhawn kawngah hmel hmuh nuam pu tur leh hawihhawm turin a chah a. Mipuiin an office enkawlte tangkai taka an hman theihnan mipui tana hna an thawh sak theih hrang hrang chu puanzar fo a pawimawh tih a sawi bawk.
Revenue minister chuan District Collector Office leh Settlement Office chu inhne hnai zawka kalkawp chho zel tur a ni, tiin, mipui rawngbawlna piahlamah chhiah lakkhawm hna pawimawh tak an neih chu ngaipawimawh turin a chah a. Department thawm changtlun zelna atan Champhai leh Mamit district pisa sakna tur cheng vaibelchhe 4.68 leh vbch. 4.5 chu Special Assistance to States for Capital Investment (SASCI) hnuaiah hmuh a ni tih a sawi a ni.
Hnathawh thlirletna hi hun then thuma hman a ni a. Land Revenue Administration in Mizoram, Revenue Collection- Tax & Non-Tax Revenue leh Stamps & Registration tih thupui hmangin an inzirtir.District tina hnathawh dan thlirlet a nih bakah department hnathawh kaihhnawiha thupui pawimawh hrang hrang zirho a ni.