Social Welfare, Women & Child Development minister Lalrinpuii chuan July 26 khan Durtlanga Home hrang hrang – Ferrando Integrated Women Development Centre (Peace Home), One Stop Centre, Bethsaida Home, Observation Home, Special Home, Daffodils Haven leh Observation cum special Home for Girls a tlawh.
Home-a awm mek naupangte nen kawmin, home-in harsatna an tawh a ngaihthlak sak a; an mamawh leina tur sumfai a hlan. Naupangte hian minister hi an thiamthil an lo entir a ni.
Peace Home hi kum 2005-a din niin, tunah hian naupang 26 leh hmeichhe humsual dai 7 an enkawl mek. Domestic Workers Training Programme kalpui thinin, Missionary Sisters of Mary Help of Christian (MSMHC) ten an enkawl a ni.
Hmeichhe baihvaite tlukluh lailawkna, One Stop Centre hi kum 2016 atanga din niin, tun thlengin harsatna neih avanga tlulut hmeichhia 399 an awm tawh. Thawktu 12 an awm a ni. One Stop Centre-ah hian vawi khatah a rualin mi 5 riah theih a ni a. Mi pakhat tan ni 5 leh zan 5 thleng a riah theih bakah an fate hruai luh phalsak an ni a; hmeichhe naupang kum bithliah awm lo leh mipa naupang kum 8 hnuailam an hruailut thei. OSC-a an awm chhung hian nu leh naupang ei leh in leh riahna, nitin mamawh zawng zawng leh dan anga hmalakna kawnga veivahna senso thlengin a thlawna tumsak an ni.
Bethsaida Home hi kum 2015-a din niin, mi 50 awm theihna a ni. Naupang kum 18 hnuailam, pianphunga harsatna nei naupang, mipa leh hmeichhia awmna a ni a. Naupang 19 enkawl lai awmin thawktu 18 an awm. Naupang awmte hi cerebral palsy (tluak zeng) avanga pianphunga harsatna nei an ni tlangpui a, nu in an pai laia an inenkawl that tawk loh vangin hetiang harsatna hi naupangah a lan theihna chance a san thin thu Bethsaida Home thawktute hian an sawi.
Observation Home hi pawikhawih avanga thubuai nei (in conflict) naupang dahna hmun a ni a, naupang 9 an awm mek. Special Home hi naupang siamthatna hmun – rehabilitation centre niin, kum 3 thleng an awm thei. Tunah hian naupang 20 an awm a, Home chhungah hian middle school kalna tur awmin, zirtirtu 5 an nei a ni.
Daffodils Haven hi mipa naupang kum 16-18 inkar, sual liantham deuh khawihte dahna a ni a. Tunah hian naupang mipa 6 an awm. Hmeichhe naupang case neite dahna Observation cum Special Home for Girls ah hian hmeichhia 7 an awm mek bawk. Daffodils Haven (Place of Safety) leh Observation cum Special Home for Girls-ah hian thawktu 13 an awm a ni. Daffodils Haven hi kum 2022 din niin, tun thlengin naupang 22 an enkawl tawh a. Special Home hi kumin January atanga din tan niin, hmeichhe naupang (kum 7 -18) case nei 13 an enkawl tawh a ni.
Minister-in Home hrang hrang tlawh
