Social Welfare minister Lalrinawma chuan Social Welfare & Tribal Affairs department enkawl Old Age Home, Ainawn Veng ami leh Protective Home Hunthar Veng ami chu Ningani khan tlawhin, thawktute nen an inkawm.
Minister chuan kum upate hlut nachang kan hriat a ngai tih a sawi a. Chhan hrang hrang avanga upa zawkte Home-a enkawl ngaia an awm chu pawi a tih thu sawiin, thawktute pawhin rawngbawlnaah ngaia thahnemngai taka enkawl turin a chah.
Old Age Home hi Mizoram sawrkar Social Welfare department hnuaiah 1989 March 1 khan hawn tan a ni a. Kum 60 chunglam Mizoram khua leh tui dik tak, chhungte enkawltu neilo awmna niin, tunah hian mi 10 enkawl mek an ni a, thawktu 8 an awm a ni.
State Social Welfare & Rehabilitation Centre Hunthar Veng ami a tlawhnaah minister chuan, hmeichhia harsatna tawk, dawmkan ngaite kaihhruaina leh an an eizawnna tur thiamthil zirtirna hmun buatsaih a ni chu lawmawm a tih thu a sawi a. Thawktute chu an inpeknaah lawmthu hrilhin, tanpui ngaite puitu leh tuamhlawmtu an nih hria a, tan la zel turin a chah.
He Centre hi kum 1990-a din niin mi 50 awm theihnaa ni a; puantah, puanthui, beauty culture leh computer-te zirtir thin niin, an an awm chhung hi thla 7 a ni a, tunah hian hmeichhia 43 leh naupang 5 awmin thawktu 22 an awm a ni.
Minister-in Home pahnih tlawh
