Minister-in insumdawnna hmun tlawh
Lawngtlai district-a India leh Myanmar inrina Zorinpui chu minister B Lalchhanzova chuan Thawhlehni khan a tlawh a, ramri kaltlanga insumdawn tawnna tur a enfiah.
Minister chuan India leh Myanmar inkalpawhna kawngpui KMMTTP Road chu kawng pawimawh tak a nih chhoh zel tur thu a sawi a. Zorinpui chu ram pahnih insumdawn tawnna hmunpui tur a la nih thuai a rin thu sawiin, a chhehvela cheng mipui chu a hlawkna tel theia lo inbuatsaih lawk turin a chah.
FCS&CA minister hian Lawngtlai Council Venga FCI kudam tlawhin a dinhmun leh hnathawh dan a enfiah a. Thawktuten kudam dinhmun tlangpui leh hmalak dan an lo hrilhfiah. Buhfai chhekkhawl an ngah thu leh a hun takah buhfai an hmuh thin thu an sawi a. Lawngtlai district mipuite tan tun dinhmunah buhfai lama harsatna a awm lo tih an lo hrilh.
Revenue minister ni bawk B Lalchhanzova hian Nilaini khan YMA Vathuampuia Branch kum 50 tlin lawmna a hmanpuinaah Revenue department chu awmze nei zawka kal turin siamrem mek a ni tih a sawi a. Ram leh in hmun pass chu tunlai thiamna hmangin chhinchhiah mek a ni, tiin, an department chu online hmanga dawr theih tur leh mimal document pawimawhte mahnia online-a haichhuah theih mai turin dah tum a ni tih a sawi.
Vathuampui Branch YMA Golden Jubilee lawmnaah hian Central YMA finance secretary MS Ralte pawhin thu sawiin, raltlante chu YMA-in a thlahthlam dawn loa, raltlante chuan an awmna khawtlang leh kohhran zia zirchiang a, anmahni insiamrem zung zung turin a chah a, khua leh tuiten chanvo kan neih ang erawh beisei rihlo turin a chah.
Minister-in insumdawnna hmun tlawh
