Minister-in sawrkar school a tlawh
School Eucation minister Dr Vanlalthlana chuan Thawhtanni khan Tlangnuam Venga Govt Primary School-I & II a tlawh bakah a bial Aizawl North-II huamchhunga MLA fund-a school hrang hrang tana thuthleng leh dawhkan a pek semchhuah a hmanpui.
Aizawl South-II bialtu MLA Lalchhuanthanga sawmna bawhzuiin Thawhtanni zing khan School Education minister hian Aizawl Tlangnuama Govt Primary School-I & II a tlawh a, Govt. Tlangnuam P/S-II hi kum 1978-a din a ni a, an building a chhiain sak thar a tul hle a, bialtu MLA hian ngaipawimawhin hma a la a, Education minister sawmin a hmunah an enfiah a ni.
Mizoramah zirna in sakthat tur tlabal tawh tak tak a tam em em a, sawrkar lu a hai hle tih minister hian sawiin, ZPM ministry-ah theihtawp an chhuah zel dawn a, chief minister-in school 50 sakthatna tur a ruahman pui a, heng zingah hian he school pawh hi a tel ve theihnan hma an la dawn tih a sawi a ni.
Aizawl North II bialtu MLA Dr Vanlalthlana hian a bial chhung zirna in hrang hranga hman tur thuthleng leh dawhkan pe in Thawhtannia a semna hun a hmanpui a. MLA fund hmangin a bial chhunga zirna in hrang hrangah naupangte zirna tur dawhkan 30 leh thutthleng 30 a siamtir a; heng bakah hian building thawmthat ngai awmte pawh bial chhunga mistiri-ten an thawmtha tih a sawi a ni.
Minister-in sawrkar school a tlawh
