Health & Family Welfare minister Lalrinpuii chuan Inrinni khan Zoram Medical College (ZMC) Falkawn leh Mizoram Nursing College (MCON) Falkawn a tlawh a. Adviser to chief minister (Technical) H Ginzalala, MLA-in a tawiawm.
Health minister chuan PMJVK scheme hnuaiah health sector lam tihhmasawn chu sawrkarin ngaihpawimawh a tum tih sawiin, hemi kaltlang hian hriselna kawngah hmasawnna nasa tak neih theih a beisei thu a sawi a ni.
ZMC registrar Dr Jane R Ralte chuan ZMC chungchanga hriat tur a sawifiah a. A pantu damlo zaa 70 chuang chu khawsak harsa, AB-PMJAY scheme hnuaia inziaklut an nih thu leh, thingtlang lama khawsak harsa zawkte pankhawm an nih thu sawiin, tun dinhmunah thawktu indaihlohna nasa tak an tawk tih a sawi a ni.
MCON a tlawhnaah an hmalakna, hmasawnna leh hmachhawp an neihte minister hnenah hian an lo thlen a. Staff quarters, lirthei leh guest lecturer indaihlohna an lo thlen bakah Champhaia Nursing School din mek pawh sawiho a ni.
Health minister chuan hostel sak hna chu chak zawka thawh a nih theih nan theihtawp chhuahpui a tum tih a sawi a. NAAC ranking tha zawk neih tum turin a fuih. Nursing School leh Mizoram Youth Commission tangduna foreign lama inhlawh tur tam zawk chherchhuah theihna lama hma lak tlan dan ngaihtuah a tul tih a sawi bawk.
Minister-in ZMC leh MCON tlawh
