Minister pakhatin MJA Kolasib District chu dawt puangzar angin vantlang hmaah a sawi a, hemi chungchangah hian MJA hian chhangletin dan hnuaiah thil tih a ni lo chu an duh loh ber a ni, tiin, dan hnuaiah chuan minister hi tawiawm zel an inhuam tih an sawi.
MJA Kolasib District thuchhuak chuan Krishi Vigyan Kendra Kolasib ram, inhmun atana theh tumna awm mekah MNF Kolasib Block chuan thuchhuah siamin chanchinbumite chu dawt puangzar/ thehdarh angin a puh a, he thil hi an hmai tibal thei a nih avangin an ngai thutak hle tih a sawi.
KVK Kolasib ramah in hmun theh tumna a awm nia an hriat avangin chanchinbumi thenkhat chuan thil awmzia hriat tumin 2023 July 6 khan a hmunah an tlawh a. KVK ramah hian in hmun thehna tur perh (peg) tam tak khen a ni tih an hmu a. A hmuna tlawhtute hian khawtlang hruaitu thenkhat bia in, thil awmdan an zawhchian hnu ah he thil hi Kolasib Vengthar MNF party hotute hmalakna a nih thu dawn a ni tih MJA Kolasib District hian a sawi.
‘KVK lam pawhin an hriat loha perh (peg) khen a nih avangin dan loa ram chhuh luih tumna (encroachment) niin an ngai a. Mi thenkhatin party pakhat press release behchhana puangzar anga MJA min puhna hi dawt a ni a, eng party in nge KVK ram chungchangah hian press release siam kan la hre lo. A hnuah Kolasib bialtu MLA, minister Pu K Lalrinliana hian helai ram hi a tlawh tumin ama tih tir a nih thu a sawi a ni,’ a ti.
In hmun neiloten in hmun an neihna tura hmalakna chu MJA Kolasib District chuan a dodal loa, in hmun neilo tak tak leh mamawh ngawih ngawih, khawtual mi nghet ngeiten in hmun nei ngei se an duhpui zawk tih sawiin, ‘Chumi kawngah chuan sawrkarin dan a nei a, dan angin engkim kaltir hmasa in hma lak ni thin se tih hi kan duhdan a ni,’ a ti.
July 12 atana minister K Lalrinliana tour programme-ah ‘In hmun neiloten in hmun an beiseina hmun KVK ram a tlawh tur thu’ copy a hmuh avangin news cover turin July 12 hian chanchinbumi thenkhat chu a hmunah an kal a. Heng mite hi MJA anga kal ni loin, mimal anga news cover tura kal an nih laiin, an beisei loh leh rin loh takin minister hian MJA Kolasib District chu dawt puangzar/ thehdarh a, eptu party ang hiala puhin, MJA member-te chu an awmna party nen lam a hriat vek thu, amah tawiawmtu official leh party worker-te hriat laiin a sawi chiam mai tih a sawi. Hemi chungchang hi mi thenkhatin an duhlai chauh ‘cut’ a tuk lamah thehdarh niin an sawi bawk.
‘Kolasib MJA member-te hi mi famkim leh fel bik kan ni lo tih kan inhria a, tlinlohna pawh kan nei thei. Chutih rualin chanchinthar thehdarh kawngah a pawnga takin thudiklo leh dawt kan chhuah kan la hre ngai lo. Inhnialna tichhuak thei chi angah phei chuan thulakna (source) rintlak kan neih loh chuan kan puangzar ngai loa, KVK Kolasib ram theh tumna awmah pawh hian department hotute berin an hriat loh avangin keini chuan dan loa ram neihsak tumna (encroachment) niin kan hria a, source rintlak tak neiin kan puangzar mai chauh a ni,’ thuchhuah chuan a ti.
MJA innghahna chu ‘Service to the people (Mipui rawngbawltu)’ a nih avangin ram leh khawtlang tana tha turah chuan huaisen takin ke an pen thin a, chutih laiin an thu puanzarah dawt a tel a nih chuan MJA Kolasib District chuan ngaihdam a dil a hreh lo tih sawiin, dawt puangzar anga inpuhna leh eptu party ang hiala inpuhna chu MLA/ minister leh politician dang ka atanga an la hriat ngai loh a nih vangin tun tuma thil thleng pawh mak an tiin, na an tih thu a sawi a. Thuthar an puanzarnaah lungawilohna an nei a nih pawhin vantlang hmaa sawi chuan awmzia a nei lo tih a sawi a ni.
‘Eizawnna atana chanchinbu /media hmangtute hi mithiam bik kan ni loa, hei vang hian mithiam zawkte ruaiin a khat tawkin workshop leh seminar pawh kan nei fo thin. Kan tlin lohna tam takah pawh hmasawn zel tumin theihtawp kan chhuah ve thin a, heti chung hian kan thlen chin ala thuilo tih pawh kan hai lo. A thiam zawk leh tihdan tha zawk hria chuan media rawngbawlna pawimawh tak hi luhchilh turin kan sawm zawk a, kan luhchilh theilo a nih pawhin min finchhuah turin chanchinbumite chu kan inhawng reng a ni,’ a ti.
Minister Pu K Lalrinliana chu ministry kalmekah minister fak hlawh pawl tak, ram tana a hmalakna kawng hrang hranga an lo thawhpui tawh thin angin thawhpui zel an duh tih MJA Kolasib hian sawiin, a kaihza vengtu party mite, Kolasib bial mipui leh Mizoram hmun hrang hrang amite pawhin minister chu a hmalaknaah dan zah tak chunga tawiawm zel turin an beisei a, an sawm tih a sawi a ni.
Minister puhna MJA-in chhanglet Dan zah chunga thawhpui zel huam
