Ministry hotu-in entrepreneurship leh
skill lama hmasawnna tur rawn enpui
Sawrkar laipui Ministry of Skill Development and Entrepreneurship secretary Atul Kumar Tiwari chu Mizoramah lokalin thalaite tan skill leh entrepreneurship lam tih hmasawn dan tur a rawn enpui.
Aizawl a thlen ve leh Govt ITI Aizawl tlawh nghalin, institution building leh infrastructure dinhmun a en a, zirlaite nen inkawmin, ITI hmasawnna atana an lo thlen hrang hrang chu ngai pawimawhin a tul anga hmalakna kalpui a nih theihnan amah rawn tawiawmtu RDSDE (Regional Directorate of Skill Development and Entrepreneurship) regional director BK Singha chu bawhzui nghal turin a hriattir.
NIT Mizoram leh National Institute of Electronics & Information Technology (NIELIT) bakah Mizoram Badminton Centre Zuangtuia grassroots badminton training kalpui mek a tlawh bawk.
Inrinni zan khan Labour, Employment, Skill Development and Entrepreneurship department hotute nen an inkawm a. LESDE minister Lalnghinglova Hmar chuan sawrkar laipuiin Upgradation of ITI kalpui tura sum thahnem tak a dah chu Mizoram-in a chhawr theihnan remchanna siam turin ministry hotu hi a ngen a. India rama a hmasa ber tura sports leh skills thuikhawm tuma Mizoram sawrkar rawtna thehluh chu pawmsak turin a ngen. LESDE bakah Mizoram Youth Commission leh Mizoram State Sports Council hotuten presentation an pe a, theih anga lo bawhzui a tum thu MSDE secretary hian a sawi.
MSDE secretary hi RDSDE hotu bakah Indian Institute of Entrepreneurship director Ishwar Poojar chuan a rawn tawiawm a. Ruahman lawk dan chuan, PMKVY hnuaia Skill Training Centre-te leh Thenzawla Mizo puantah hmanga eizawnna kawnga hma lak mekna – Handloom Centre tlawh a tum bawk.
Ministry hotu-in entrepreneurship leh skill lama hmasawnna tur rawn enpui
