Minority tana thil tha tih theih ang chu sawrkarin a ti zel dawn – Chief minister

Mizoram-a minority-te hmakhua chu state sawrkarin a ngai a, an tana thil tha a tih theih chi chu an ti zel dawn tih chief minister Lalduhoma chuan a sawi.
Mizoram Gorkha Youth Association (MGYA) chuan Thawhlehni khan kum 50 an tlin, Golden Jubilee Aizawlah an lawm a. Hmanpuitu chief minister chuan, tlangmi ve tho an nih avang leh Mizote ang bawka hnam tlawmngai leh nunnem tak an nih avangin kan pi leh pute pawh khan Gorkha-te an ngaina a, chengho tura khuanu duan ang maiin kan inngeih zui ta a. Vawiin thlengin kan inkarah innghirnghona a la awm ngai lo tih a sawi.
Kum 1966-a Mizoram a buai khan Gorkha thalai engemawzat Mizoram tan an rammu tih sawiin, “Dam leh tlang khatah, thih leh ruam khatah, tiin kan lo tuarin kan beiho a. Mizoram Gorkha unaute thusawi, thinlunga cham reng thin chu – Mizoram bak lu nghahna hmun kan nei lo, tih hi a ni,” a ti.
“Kan sawrkar hian minority-te hmakhua kan ngai em em a, an tana thil tha kan tih theih chi hi chu kan ti zel dawn a, thlamuang takin awm ula kan duh,” a ti bawk.
Ram rorelnaah pawh District Council hunlai khan Gorkha engemawzat VC nominated member-ah an awm a, UT kan nihin Pu Kapurchand Thakuri chu nominated MLA atan dah a ni bawk tih Lalduhoma hian a sawi.
Hmanpuitu dang Central YMA president R Lalngheta chuan, Mizoram Gorkha-te khawtlangah an lo lawm em em a, an hnawk loa, lungrual takin Mizote nen an kaltlang zel a, YMA ah inthlahrung loin, a tul ang ang titlang zel turin a sawm tih a sawi.
OBC (Other Backward Classes) chungchanga MGYA lehkha chu Central YMA-in a lo hmu a, NGO Coordination Committee-ah a tul angin an lo ngaihtuah anga, chutihrualin mimal ngaihdan niloin, committee duhdan anga kal tur an ni tih erawh hriatsak turin a ngen tih a sawi a ni.
Mizoram Gorkha Youth Association hi 1976 August 18-ah Khatla Venga Gorkha thalaiten bultanin an din a, Mizoram pum huapin kum 1976-ah a kal tan a, tunah hian branch 17 a nei mek. Jubilee lawmnaah hian Chhingchhip Sainik School cadet zinga National Defence Academy & Naval Academy Exam-a tling thei hmasa ber Agastya Thapa hnenah lawmpuina thuziak hlan a ni.