India-a US Ambassador Sergio Gor-a’n Prime Minister Narendra Modi-a leh President Donald Trump-a te minute 40 chhung phone-in an inbia tih a sawi a. Kumina phone-a an inbiak vawi thumna niin February 28-a US leh Israel tang dunin Iran beiha Asia khawthlanga buaina a chhuah hnua a vawi hnihna a ni.
February 2 khan trade deal-a hmasawnna awmte puang turin an inbia a, March 24 khan Asia khawthlang dinhmun sawiin an inbe leh a. Tun hi kumina a vawi thumna a ni ta a ni.
Kar tawp khan Pakistan khawpui, Islamabad-a inbiaknaah rah tha a chhuak lo va, hei vang hian indona kal mek hi engtin zel nge tih hriat a ni lo va. April 22 thlenga inkahhai puan a ni mek thung a, tharum thawhna a awm rih lo.
US palai chuan phone-a inbiaknaah hian Trump-a’n Modi-a hnenah Asia khawthlanga thil awm dan a hrilh thu a sawi a, US-in Iran lawng chawlhhmun a khar chungchang pawh a sawi tel a. US leh India inkarah hian inremna lian tak thenkhat beisei a nih thu a sawi bawk a, hetah hian energy lamah pawh a tel.
Prime Minister Modi-a pawhin X-ah Trump-a nena an inbiaknaah hian thil hrang hranga ram pahnihte thawhhona neih theihna tura hmasawnna an thlirho thu a tar lang a. “Kan Comprehensive Global Strategic Partnership hi kawng tinrengah tihchak lehzual kan tum a ni,” tiin a tar lang.
Modi-a hian Asia khawthlang dinhmun pawh an sawi dun thu leh, ‘Strait of Hormuz chu inhawng leh him taka vawn reng a pawimawh thu an sawi’ tih a tar lang tel bawk.
Buaina chhuah hnua phone-a an inbiakna hmasaah Modi-a hian Asia khawthlanga a hma thei ang bera remna siam chu thlawpin Strait of Hormuz chu inhawng leh him taka a awm reng theih nan hmalak a tul thu a lo hrilh tawh a. A inbiakna chungchang a tar langah prime minister hian Trump-a hnen atanga biakna a dawn thu leh ‘Asia khawthlang dinhmun chungchangah ngaihdan tangkai tak an inhrilh’ tih a lo tar lang tawh a ni.
“India hian a hma thei ang bera boruak tihdaih leh remna siam leh hi a thlawp a, Strait of Hormuz chu inhawng, him leh thlen theih a nih theih nan hmalak hi khawvel pum tan a pawimawh hle a ni,” a ti a ni.
Tun hnaia phone-a hruaitu pahnih inbiak hi kartawpa kum 47 hnua hmaichhana Iran leh US an inbiakna neih hnu lawkah a ni a. Inbiaknain rah tha chhuah loh hnuah Trump-a chuan US-in Iran lawng chawlhhmun leh tuipui kama awmte a dan thu a puang a, hei vang hian Tehran chuan Persian Gulf leh Gulf of Oman-a lawng chawlhhmunte tichhiatah a vau phah mek.
Hetih lai hian US leh Iran hi tun kar chhung emaw, kar thar tir lamah emaw an inbe leh mai thei tih sawi a awm a. Trump-a ngei pawhin hei hi a sawi tawh.
Minute 40 chhung phone-in Modi-a leh Trump-a inbia
