Chinese rawlthar, Yuyap City, Ningbo, China-a cheng, junior high school chhuak hlim hlawl, Zhou Qi chuan minute khata inhruaizuan hnem thei ber record a siam a, vawi 374 a zuang hman. A hmaa hetiang record chu 2013-a Japanese Daisuke Mimura siam niin, minute khatat vawi 348 a zuang hman a, kum 10 zet he record hian khumtu a neih loh hnuah Zhou Qi chuan a rawn khum ta a ni.
Zhou Qi hian a hmain record siam tumin Guinness World Record-a lo be pawp tawh a, mahse, chumi tum chuan guideline a zawm famkim loh avangin an pawm sak lo va, mahse, beidawng mai lovin tunah chuan a tum ram a thleng ta a ni.
Zhou Qi chuan, “Ka tih that ber tum chuan minute khatah vawi 398 ka zuang hman a, chu chu 2022-a 3rd Primary and Secondary School Students’ Rope Skipping Championship-ah a ni a. Chutihlai chuan world record chu khum tumna ka nei ta a, mahse, middle school kal lai chuan a buaithlak ve ang reng a, ka nghak leh ta hret a ni,” a ti.
Zhou Qi hi an school rope skipping team-ah kum 7 a tel a, intihsiakna chi hrang hrangah pawh a chhuak tawh thin. Elementary school a kal lai chuan ni khatah vawi hnih training a nei thin a, hetiang taka a beih ngawrh avang hian team record te pawh an siam hial a ni. Junior high school a kal hnuah pawh a la training chhunzawm zel a ni.
Minute khat chhunga inhruizuan hnem record siam
