Mipa kan thi nasa – Lalruatkima

Mizo mipate kan thi nasa a, kan inenkawl ulul lehzual a ngai tih minister Lalruatkima chuan a sawi.
Aizawl West II bialtu MLA ni bawk Lalruatkima hian Thawhtanni khan MHIP Tuikual South building, a MLA Fund Rs. 551934 leh Aizawl deputy mayor R Thanglura fund hmanga sak chu a hawng a. Mizoramah NGO tha tak tak kan nei a, sawrkar leh kohhrante nen NGO hi tangtlangin Zoram tan an tangkai takzet a. Heng lungthu pathum avang hian kan ram leh hnam leh sakhua in a him phah a, hrilen lai pawhin an tanrual that azarah kan dam khawchhuak thei, tiin a sawi a ni.
Chhungkuaa dinhmun pawimawh tak chelhtu chu hmeichhia an ni tih a sawi a. Tunlaiin hmeichhia leh mipa kan intam hleih ta hle tih sawiin, “Death rate en pawhin mipa kan thi nasa em em a, a pawi takzet a ni. Kan hriselna lam thu ah Mizo mipate kan inenkawl uluk lehzual a ngai hle a ni,” a ti.
Eizawnna leh sumdawnna lamah pawh Mizo hmeichhiate indaihzai ta hle tih MLA hian a sawi. “Khawiah nge Mizo mipa kan awm tak, tih tur hial a ni ta. Mizo mipaten chak lo zawka kan ngaih hmeichhiate atang hian kawng hrang hrangin zir tur kan ngah a. Taimakna, tumruhna, teirei peihna leh kawng hrang hranga Mizo mipaten hmeichhiate kan entawn a ngai ta hial zawkin a lang,” a ti.