Relationship lama mithiam ten zirchianna an neihah mipa ten hmeichhia aiin a let thumin “Ka hmangaih che” tih tawngkam hi sawi mai an awlsam zawk niin an sawi.
Pennsylvania State University a mithiam ten zirchianna neiin, mipa 171 an zirchiannaah chuan 25.87% te chuan hmeichhia te hmangaihna zunah an uai hma zawk niin an ngai a, chutih laiin hmun li a thena hmun thum te chuan hmeichhia te chu “Ka hmangaih che” tih tawngkam hmang hmasa zawk turah an ngai bawk a ni.
Mahse, an thil tawn tawh te atanga an han zirchian tak tak chuan, mipa te chu kar rei lote chhungin hmangaihna zunah an uai mai, chutih laiin hmeichhia te chuan thla hnih thla thum te an mamawh thung. Hetianga mipa ten “Ka hmangaih che” tih mai an awlsam zawkna chhan hi a tlangpui thuin hmeichhia te han khawsak pui deuh an duh thin vang niin an sawi bawk.
Zirchianna an neih atanga an hmuh dan chuan mipa 64% te chuan “Ka hmangaih che” tih hi an ngaihzawng te an hrilh hmasa zawk a, chutihlaiin hmeichhia 18% te chuan mipa aiin “Ka hmangaih che” an ti hmasa ve thung.
Zirchianna neitute chuan, “Hmeichhia te chu mipa aiin an fimkhur zawk a, an insum thei zawk a, mipa te chuan an hmangaihna chu mipat hmeichhiatna lam hawia kalpui nghal mai an duh thin vangin ‘Ka hmangaih che’ tih mai an awlsam zawk a ni,” an ti bawk.
He zirchianna chung chang hi Journal of Social Psychology-ah tarlan a ni.
Mipa ten ‘Ka hmangaih che’ tih an awlsam zawk
