Mipa ti deuh huam huam chi a ni em?
Hmeichhe thenkhatin an ngaihzawng emaw kawppui emaw te chu an tel lo an awm theih loh zia an sawi te i hre tawh em? I awih lo mai thei a, chutiang khawpa hmeichhe mamawh mipa an awm theih pawh i ring lo mai thei. Mahse, hetiang mipa an awm ve tlat. ‘Mr Needy’ an tih loh leh ‘Mr Desperate’ te an ti a, an ngaizawng te bula engtik lai pawha awm deuh reng mai an tum a, an ngaihzawng te chu han hawi thawvenna leh thawk han lak vena hun siam sak nachang pawh an hre lo. Chutiang mipa chu a ni dawn tih hmeichhia te tan hriat lawk theih dan a awm niin relationship lama mithiam ten an sawi a, kan rawn tarlang e.
1. In inrim nel tan ta deuh maw tih atangin thu thlum tak tak a fah deuh reng ang che. Nileng lengin a rawn text deuh tluk tluk che ang a, a ngaihtuah veng veng che, tih leh a mithlaah i cham reng, tih vel te pawh an rawn thawn deuh sek ang che. Engtik lai pawhin inhmuh a duh deuh reng ang a, a hun leh hmun pawh a thliar teh vak lo ang. I hnathawhna hmun thleng thlengin a zui mai ang che. Chutiang mipa chu a ‘desperate’ mah mah a, hmeichhia a mamawh viau pawh a ni mai thei!
2. I bula a awm duh vang leh a thlakhlelh vang chein a thiante zawng zawng a thlah vek em ni? A tirah chuan chutianga a han ti vel chu a romantic pawh i ti viau mai thei. A thiante aia min ngaipawimawhtu chu kan duh theuh ang chu. Mahse, a thiantha zawng zawng pawh nangmah avangin a thlah thlam fai vek a nih chuan ‘Mr Needy’ sign a ni. A thiante a thlah ang bawkin nang pawh in thlah turin a phut ve thuai ang che.
3. Tih tur leh tih loh tur te a hrilh deuh reng ang che a nih chuan ‘Mr Needy’ sign a ni. Amah chu nge i duh zawk thildang tiin duhthlang tir a tum fo ang che. I thil tih duh leh chak zawng te chu amah nena i duh zawk thlan tir che te pawh a tum ang. Chutiang chu tih lawm tum reng rengin i hun i hman a tul dawn tih hria a, kalsan rang mai rawh.
4. I thiante nena inawm laiin a bula awm tur koh che a tum talh ang. Ngaihzawng/ kawppui te tel lo a thiante nena han hawi thawven te hi kan mamawh a, nuam kan ti theuh. I thiante nena in inkawmhonaah pawh tel ve zel a tum a, a thlahthlam thei lo che a ni ber ang chu. ‘Mr Needy’ sign a ni.
5. Engkim mai kalpui zung zung a duh a, inneih leh fa neih thlengin a rawt chung chung a, naute hming tur nen lam a lo hual lawk tawh! Engamah hmaa ama mamawhna leh duhna ringawt changchawia a nawr chiam chiam che a nih chuan ‘Mr Needy’ sign a ni.
6. Zingkarah a rawn hmu a, chhunah a rawn bia a, tlaiah a rawn hmu leh zuai che a, zanah a rawn leng leh a! A tukah pawh chutiang bawk chu! Chutiang mipa chu ‘Mr Desperete’ sign a ni. Hmeichhe tel loin a awm thei lo emawni le!
7. Facebook-ah te i thu leh thlalak post apiang, amah kaihhnawih lem lo pawh a lo ‘like’-in a lo comment nghal zel a. Chutiang a nih chuan social networking page-ah te khan a lo thlithlai ru reng che tihna a ni. Facebook-ah chauh lo pawh i chetvelna reng rengah a enthla deuh reng che ang a, i thawveng lo ngawt ang!
Mipa ti deuh huam huam chi a ni em?
