Mipa ten nupui zawnna kawngah hmel leh pianzia leh hnam an ngaihpawimawh laiin hmeichhia te chuan pasal an zawnna kawngah eizawnna leh thiamna lam an melh ve thung, tiin matrimonial site pakhat chuan ‘preference trends’ survey, zawnglai te zinga an neih atangin an hmuchhuak niin an sawi.
Internet kaltlanga nupui pasal inzawnna (matrimonial site) lar tak Jeevansaathi.com he survey hi neiin, mipa te chuan a tlangpui thuin an nupui turte chu an pianzia leh hmel bakah family background an ngaipawimawh a, hmeichhia te erawh an pasal turte eizawnna leh educational qualification an ngaipawimawh ve thung. Hmeichhia te chuan internet-a pasal tur an zawnin an hmel leh pianzia lam an ngaipawimawh lo.
Jeevansathi.com business head Manghnani chuan, “Mipa ten family background an ngaipawimawh hi a mak khawp mai, an chhungte phalna lak a ngaih dawn vang te pawh a ni ang. Hmeichhia ten eizanna leh zirna lam an ngaihpawimawhna chhan hi chu him (secure) an duh vang a ni thei ang,” a ti.
He survey-ah hian mipa te chuan an nupui turte thiamna leh eizawnna lam chu ngaihpawimawh loh berah an nei thung a, hmeichia te chuan family background hi ngaihpawimawh pahnihnaah an nei ve thung a ni.
Mipain hmel an en, hmeichhia erawhin sum!
