Mipui Aw…

Khua leh tuiten an harsatna, vuivaina leh an chanvote an zawhfiah theihna tur ‘Mipui Aw’ nimina tlangzarhtu chief minister chuan, mipui sawrkar, langtlang sawrkar kan din theih nan mipuite nen inpawhna tha tak kan neih a ngai, tiin a sawi a. Mipuite ngaithla turin kan inpeih at reng a, keimahni duhna aia mipuite duhna dah hmasak hi kan inhuam a, chu chu mipui rorelna ram democracy innghahna pawimawh a ni, a ti bawk.
Mipui rorelna democracy ramah chuan mipuiin thuneihna an nei sang hle a; an aiawha roreltu tur an thlang phawt a, thuneihna an hlan leh a, chu thuneihna hmang chuan mipui aiawha thlanchhuahte chuan ro an rel thin.
Mipui Aw kaltlang hian mipuiin an aiawha roreltute hnenah an harsatnate, an vuivaina te leh an chanvo leh duh dan te an thlen thei dawn a ni a, hei hi sawrkar tan chuan chona lian tak a ni.
Chona lian tak a nih chhan chu, Mipui Aw kaltlanga mipuiin thu an thlente hi sawrkar chuan eng tinnge hma a lak thin tih hi mipui hriata a puanzar zel theih emaw, a puanzar zel ngam emaw a tul dawn a, chuti a nih loh chuan, Mipui Aw kaltlanga thu thlentuten an thu thlenin eng tinnge nghawng a neih tih an hriatzui leh si loh chuan, he Mipui Aw hian tangkaina emaw, hlutna emaw a nei leh dawn lo tihna a ni.
Mi pakhatin vuivaina emaw, harsatna emaw a thlen a, eng tin nge sawrkarin a bawhzui tih hriatzui tur a awm leh si loh chuan awmzia a nei tam lo hle dawn tihna a ni a. Mipui Aw ni ve si, a sawhkhawk hriat zui tur a awm loh chuan a dik dawn lova. Sawrkar chuan Mipui Aw apiang a chhan zat zat a pawimawh dawn a, chumi ti thei tur chuan chona hi a lian hle a ni.
Thil tha tak hi kan rawt chhuak a, a bul hi kan tan ve mai thin a. A lo rei deuh a, hriatzui tur awm mumal lovin a zuzi leh mai thin. Mipui Aw hi chu mipui rorelna ngai pawimawh sawrkar tan chuan tih zuzi chi a ni dawn lo a ni.