Mipui bum tuma ZPM leader thusawi hi kan ngai thutak – MPCC

Sawrkar leiba chungchangah thudik chanve hmanga mipui bum tumah Congress party chuan ZPM leader Lalduhoma puhin, an ngai thutak hle tih an sawi.
MPCC thuchhuak chuan, ZPM Champhai North Block Conference-ah Pu Lalduhoma hian Mizoram sawrkar leiba chungchang a sawinaah sawrkar leiba tam tak inchhekkhawl chu tun sawrkar mek leiba chauh ni loin, sawrkar hmasa atanga inchhekkhawl chho zel a nih thu a sawi a ni, tiin, ‘Document tha leh rintlak hai chhuah zung zung tur a awm tawh lai a, thudik chanve hmanga mipui bum a la tum fan hi kalphung thar an aupuiah beisei tur a awm chuang lo tih hi Congress party ngaihdan a ni,’ a ti.
MNF sawrkar apiangin Mizoram sawrkar leiba a pung nasa tih chu thudik a nih thu sawiin, Pu Lalduhoma sawi angin state leiba chu GSDP atanga teh tur a ni bawk tih a sawi a. MNF sawrkar term hmasa lamah sawrkar leiba chu kum 2004-ah GSDP atanga tehin 102%, 2005 ah 108.9%, 2006 ah 106.2%, 2007 ah 101.9% leh 2008 ah 103.5% a ni tih a sawi.
Kum 2008 atanga Congress a sawrkar hnu in, nasa takin state leiba a kiam a. 2018 Congress term tawpah leiba chu 32% ah tla thlain MNF sawrkar leibat sa, GSDP atanga teha 71.5% chu Congress sawrkarin a rul tih a sawi. Hei mai ni loin 2016 June 30-a RBI a Ways & Means hmanga sum puk kha Congress sawrkarin Ways & Means hmanga a sum puk hnuhnun ber a ni nghe nghe tih a sawi bawk.
‘Assembly House ah ngei Pu Lalduhoma hian Mizoram leibat chungchang sawiin, 2018-2019 a Congress a tlak kum khan fiscal deficit hi vaibelchhe 352.93 kan nei a, chu chu 1.58% a ni. Vawiinah hian khatihlaia Finance minister Pu Lalsawta khan a ti tha a ni tih ka sawi duh a, ka tan a ni lo, thudik ka sawi a ni. 3% chin kha min phalsak a, 1.58% ah fiscal hi a tihniam thei a; a fakawm a ni. Tunah MNF a lo sawrkar ve leh a, kum khat a sawrkar a, 1.58% atang khan kum khat chhung lekin vaibelchhe 2215 fiscal deficit nei hmanin 8.34% a chho hman a ni, tiin a sawi,’ MPCC thuchhuak chuan a ti.
He a thusawi hi Assembly proceeding-a hai chhuah theiha awm vek a nih thu pawh sawiin, ‘A awmna hmun azira a thusawi danglam thin Pu Lalduhoma hian Assembly House-a Pu Lalsawta sum enkawl thiam zia a sawi hnu a, political platform atanga leiba chungchanga Congress hmer tel a tum leh ta mai hi Congress party chuan pawi a ti a. Thudik hai chhuah mai tur a awm lai a, mipui bum zawnga thusawi tawh lo turin Pu Lalduhoma hi kan ngen a ni,’ a ti.